Thaçi, thirrje qytetarëve: Respektoni rekomandimet e IKSHP-së, mbani distancën dhe kujdesuni për higjienën

Presidenti i vendit, Hashim Thaçi tha sot se Instituti Kombëtar i Shëndetësisë Publike, Forca e Sigurisë së Kosovës, Policia janë duke e kryer me përpikëri punën e tyre, ndërsa tha se tani rolin kryesor e kanë qytetarët nga të cilët kërkoi që t’iu përmbahen rekomandimeve për mbajtjen e distancës dhe kujdesin për higjienën.

Thaçi në një postim në Facebook tha se si shtet janë të përgatitur dhe po punojnë që t’i shtojnë kapacitetet mjekësore.

Lexoni të plotë postimin e Thaçit:

“Instituti Kombëtar i Shëndetësisë Publike është duke e menaxhuar gjendjen dhe kufizuar përhapjen e virusit COVID-19.

Policia është duke e kryer me përpikëri punën e vet dhe duke e ruajtur rendin dhe qetësinë publike.

Forca e Sigurisë së Kosovës është në gjendje gatishmërie me të gjitha kapacitetet e veta mjekësore dhe logjistike për të ndihmuar në tejkalimin e rrethanave të krijuara nga virusi COVID-19.

Rolin kryesor tani e kanë qytetarët.

Të kujdesemi për higjienën tonë. Ta ruajmë distancën fizike mes nesh. Të dalim nga shtëpitë vetëm kur kjo është e domosdoshme. Këto ditë janë kritike për ta kufizuar përhapjen e COVID-19 dhe për t’i lejuar kapacitetet ekzistuese që të përballen me rastet që paraqiten.

Si shtet jemi të përgatitur dhe po punojmë të gjithë së bashku që t’i shtojmë kapacitetet mjekësore, ta ruajmë furnizimin me ushqime dhe materiale sanitare, të ndërmarrim masa dhe t’i ruajmë punëtorët dhe bizneset, të cilat duhet të ndihmohen me politika lehtësuese në muajt e ardhshëm.

Së bashku do të tejkalojmë edhe këtë sfidë!”. /Telegrafi/