Manastirliu raporton në Kuvend: Shqipëria me asnjë person të prekur nga Coronavirusi

Ministrja e Shëndetësisë, Ogerta Manastirliu në fjalën e saj në Kuvend, duke folur për Coronavirusin tha se Shqipëria nuk ka asnjë person të prekur nga ky virus.

Manastirliu theksoi se Ministria e Shëndetësisë ka marrë masa për parandalimin e Coronavirusit, duke nënvizuar se janë shtuar aksionet për të ndaluar situatën.

“Shqipëria ka marrë masa për kontrollin dhe mbrojtjen ndaj Coronavirusit. Aktualisht Shqipëria nuk ka aktualisht asnjë rast të prekur nga Coronavirusi i ri deri në momentet që flasim. Janë 31 të testuar, që kanë rezultuar negativ sa i takon prekjes nga Coronavirusi i ri. Ne kemi përforcuar aksionet tona për të ndaluar situatën. Kemi forcuar të gjitha kapacitetet laboratorike për identifikimin e Coronavirusit të ri. Janë përcaktuar gjithashtu udhëzuesit si të veprojmë ndaj këtij virusi. Masat që kemi ndërmarrë janë shumë të rëndësishme, pasi shtimi i masave të higjienës personale ndalojnë Coronavirusin e ri. Kemi dyfishuar punonjësit në pikat kufitare”, tha Manastirliu.

“Janë marrë masat për të rritur sigurinë në shëndetësinë tonë. Kemi marrë masa edhe me medikamente. Janë marrë masa në Spitalin Efektiv, në Spitalin Shefqet Ndroqi për të përcaktuar rastet. Kemi shtuar kapacitetet e Emergjencës Kombëtare. Janë mbi 5,000 telefonata në ditë për shkak të emergjencës. Për situatën do të vazhdojmë të mbajmë situatën nën kontroll. Dua t’ju them qytetarëve që të mos jenë në panik”, deklaroi ministrja. /TCH/