Basha uron pavarësinë: Kosova dhe aspirata jonë e përbashkët drejt integrimit do të jetë misioni ynë i madh

Kryetari i Partisë Demokratike, Lulzim Basha ka bërë një urim të gjatë për 12-vjetorin e pavarësisë së Kosovës, duke thënë se edhe nëse PD vjen në pushtet Kosova dhe aspirata e përbashkët drejt integrimit do të jetë misioni i madh.

Kreu i PD shkruan ndër të tjera se Kosova dhe Shqipëria do të jenë bashkë në këtë rrugëtim, prandaj duhet të qëndrojnë të forta në qëndrimet për të ardhmen.

“Sot në krye të opozitës e nesër në krye të qeverisjes së vendit, Kosova dhe aspirata jonë e përbashkët drejt integrimit do të jetë misioni ynë i madh. Të dashur vëllezër e motra të Kosovës, në ditën e dytë më të rëndësishme të historisë sonë kombëtare, ju uroj nga zemra gëzuar përvjetorin e 12-të të shtetit të Kosovës! Këto nuk kanë qenë vite të lehta për Kosovën, sikundër dhe rruga e së ardhmes është e mbushur me sfida. Por si përherë, jam i bindur se me pjekuri, durim, forcë e mençuri do t’i përballni me sukses të gjitha sfidat përgjatë rrugës së vështirë të shtetformimit. Në këtë ditë kaq të bukur dhe të rëndësishme për kombin, dua të shpreh angazhimin tim se çdo ditë të jetës dhe punës time, sot në krye të opozitës e nesër në krye të qeverisjes së vendit, Kosova dhe aspirata jonë e përbashkët drejt integrimit do të jetë misioni ynë i madh. Ne do të jemi bashkë në këtë rrugëtim, prandaj edhe më të fortë edhe më të qartë se asnjëherë më parë për të sotmen dhe të ardhmen tonë. Gëzuar Kosovë!”, shkruan Basha./Telegrafi/