Abdixhiku: MIT në Qeverinë e kaluar ka dhënë tender prej 110 milionë euro pa u miratuar buxheti, do t’i nisë procedurat për anulim

Ministri i Infrastrukturës dhe Ambientit, Lumir Abdixhiku, ka bërë të ditur se Ministria e Infrastrukturës dhe Transportit në mandatin e Qeverisë së kaluar ka shpallur një tender në vlerë prej 110 milionë euro për ndërtimin e 24 kilometra autostradë dhe për këtë theksoi se do t’i nisë procedurat për ndalimin e këtij tenderi, që sipas tij është i jashtëligjshëm.

Abdixhiku në konferencën për media, ka thënë se vendimi për shpalljen e këtij tenderi është marrë kur Qeveria ishte në ikje, pra më 13 janar, transmeton Telegrafi.

“Ministria e Infrastrukturës dhe Transportit në mandatin e Qeverisë së kaluar saktësisht më 13 janar të këtij viti ka shpallur tender në vlerë prej 110 milionë euro për ndërtimin e 24 kilometrave autostradë, në këtë kohë të shpalljes së tenderit, me implikime e norma buxhetore, vendi nuk kishte qeveri të re, e për me tepër as buxhet të miratuar për vitin 2020. Gjatë ditëve të para si ministër i Infrastrukturës dhe Ambientit janë vënë në dijeni të dy opinionet institucionale rreth këtij tenderi. Njëri nga Komisioni rregullativ i prokurorimit publik, dhe tjetri nga Ministria e Financave nga qeveria e kaluar. Të dyja opinionet theksojnë qartë se pa ndarje të buxhetit nuk mund të shpallen thirrje që krijojnë obligime financiare për Republikën e Kosovës. Gjithashtu është e padëgjuar që një qeveri në ikje të fus në obligime financiare qeverinë e ardhshme. Prandaj bazuar në dokumentet e propozuara të unë, sot kam kërku nga organet përgjegjëse të Ministrisë, se pa vonesa dhe urgjentisht t’i shikojnë procedurat për anulimin e tenderit në fjalë”, ka thënë ai, raporton Telegrafi.

Ministri Abdixhiku, po ashtu ka paralajmëruar se do t’i shqyrtojë të gjitha vendimet e ministrisë gjatë mandatit të kaluar. /Telegrafi/