Zgjedhjet e parakohshme, Basha propozon modelin maqedonas

Modeli maqedonas do të ishte një garanci për lirinë e votës sipas Lulzim Bashës.

Kreu demokrat tha gjatë bashkëbisedimit me qytetarët në Facebook se Partia Demokratike i qëndron kërkesës së saj për zgjedhje të parakohshme me një qeveri teknike transitore.

Kjo sipas tij do të ndalojë qeverinë e mazhorancës që të shkatërrojë procesin zgjedhor.

“Së pari, vendit t’i jepet mundësia, përmes zgjedhjeve të parakohshme, të zgjedhë një parlament legjitim, që të jetë produkt i votës së qytetarëve. Të jenë qytetarët ata që do të vendosin për cilën parti, për cilin program, për cilët deputetë do të votojnë.

Së dyti, që ky proces të garantohet, rregullat e lojës të jenë të barabarta për të gjithë.

Së treti, që këto rregulla loje të zbatohen, të kemi një arbitër të paanshëm dhe jo një qeveri, e cila, për hir të pushtetit apo aferave, në të cilat është zhytur, është gati të shkatërrojë procesin zgjedhor, vetëm e vetëm të mbajë pushtetin. Për këtë arsye, ne i qëndrojmë pikë për pikë kërkesave që kemi parashtruar prej datës 16 shkurt të vitit të kaluar, zgjedhje të parakohshme me një qeveri transitore pa këtë kryeministër, sepse, në fund të fundit, është ky kryeministër dhe kjo qeveri që kanë vjedhur zgjedhjet”, tha Basha, raporton opinion.

Kreu i opozitës e sintetizoi kërkesën e opozitës për zgjedhjet në “Mos vidh” dhe propozoi që në Shqipëri të aplikohet modeli i Maqedonisë së Veriut ku 100 ditë përpara zgjedhjeve, vendin e qeveris një qeveri teknike.

“Kërkesat tona janë fare të thjeshta. Kërkesa jonë kryesore është – mos vidh! Po dëgjoni shpesh, që njerëzit më problematikë, që janë kapur duke vjedhur zgjedhjet, duke blerë vota me krimin e organizuar, na japin leksione mençurie çfarë do të bëjmë me zgjedhjet. Çfarë do të bëjmë me zgjedhjet? Mos vidh! Ju jeni hajdutët e zgjedhjeve, mos i vidhni zgjedhjet! Nuk është çështje dëshire për t’i besuar dikujt që ka vjedhur jo një, jo dy, por tre palë zgjedhje, edhe një palë zgjedhje pa kundërshtarë, siç ishte 30 qershori. Prandaj, qeveria transitore është një garanci. Siç funksionon në Maqedoni, le të funksionojë edhe në Shqipëri” , tha Basha.