Instituti GAP: Qeveria e re theu premtimin për numrin ministrive por do të kursejë 13 milionë euro

Bazuar në premtimet zgjedhore të Lëvizjes Vetëvendosje dhe Lidhjes Demokratike të Kosovës, Instituti për Studime të Avancuara (GAP) kishte publikuar një grafikë e cila pasqyron kursimet qeveritare në rast se qeveria e re i përmbahet premtimeve për numrin e posteve ministrore.

Sipas GAP, qeveria e dalë nga zgjedhjet e 6 tetorit 2019 nuk i’u përmbajt në tërësi premtimit.

“Qeveria e dalë nga zgjedhjet e 6 tetorit 2019 nuk i’u përmbajt në tërësi premtimit. Sot, Instituti GAP publikon infografikën e re lidhur me postet ministrore dhe ndryshimet nga qeveria e kaluar”, thuhet në njoftimin e GAP-it, përcjell Telegrafi.

Nga 21 ministri që ishin gjatë qeverisjes së Ramush Haradinajt, qeveria e re e krijuar nga partnerët e koalicionit Lëvizja Vetëvendosje dhe Lidhja Demokratike e Kosovës, nën drejtimin e Albin Kurtit do t’i ketë 15 ministri.

Lexo po ashtu Qeveria Kurti me 15 ministri, lista që tregon se si u ristrukturuan ato

Qeveria Kurti, përveç 15 ministrive do t’i ketë dy zëvendëskryeministra dhe 33 zëvendësministra, ndërsa, Qeveria Haradinaj kishte pesë zëvendëskryeministra dhe rreth 90 zëvendësministra. /Telegrafi/