Transformimi i Tyson Furyt para rimeçit ndaj Deontay Wilder

Tyson Fury e ka treguar formën e tij fizike para rimeçit të shumëpritur ndaj kampionit të WBC-së, Deontay Wilder, që zhvillohet gjatë këtij muaji.

Në dhjetor të vitit 2018, dy boksierët e peshave të rënda u ndanë baras, ndërsa më 22 shkurt në Las Vegas do të vihen sërish përballë njëri-tjetrit.

Lexo po ashtu Tyson Fury zbulon tri meçet që dëshiron t’i zhvillojë para se t’i jap fund karrierës së tij në boks

Pas problemeve private dhe mendore që e lanë jashtë ringut për një kohë të gjatë, britaniku iu kthye boksit në qershor të vitit 2018 me duelin e parë ndaj shqiptarit Sefer Seferi.

Asokohe, ai peshonte 124 kilogramë, mirëpo në katër ndeshjet që pasuan, Fury po bëhej gjithnjë e më i lehtë. Në meçin e parë ndaj Wilder, britaniku peshonte 115.5 kilogramë.

Mirëpo, babai i tij, John, kishte deklaruar se Fury nuk e kishte fuqinë për ta nokautuar amerikanin, prandaj e kishte kritikuar trajnerin Ben Davison, me të cilin boksieri tashmë i ka ndarë rrugët.

Dhe për rimeçin kundër kampionit të WBC-së, 31-vjeçari ka ndërtuar një figurë muskulore dhe ka premtuar se do të jetë në optimalen e peshës, rreth 120 kilogramë.

Kujtojmë që në periudhën kur vuante nga problemet mendore, Fury kishte shtuar peshë mbi 170 kilogramë. /Telegrafi/