Thaçi, Kurtit: Pres të takohemi në ditën që ke propozuar, në orën 15:00

Presidenti i Kosovës, Hashim Thaçi, ka mbajtur një konferencë të fundvitit, ku në një bashkëbisedim me gazetarë ka folur për të arriturat dhe sfidat e vitit që po lëmë pas.

Thaçi në fillim ka thënë se viti 2019 ka qenë një vit i progresit, në të gjitha rrafshet, qoftë në thellimin e reformave demokratike, rendit dhe ligjit, forcimit të demokracisë civile në Kosovë dhe të orientimit veriatlantik të vendit, të marrjes së përgjegjësive nga shteti ynë, në veçanti mbajtja e zgjedhjeve.

Megjithatë, sipas presidentit Thaçi, viti 2019 nuk ka qenë krejt i lehtë, pasi ka pasur edhe sfida, të cilat ai shpreson se do të tejkalohen vitin e ardhshëm.

Presidenti Thaçi ka folur edhe rreth krijimit të institucioneve, përkatësisht rreth ftesave që i ka bërë kryetarit të Lëvizjes Vetëvendosje, Albin Kurti.

Ai ka thënë se e mirëpret faktin Albin Kurti, pas tri tentativave radhazi e ka pranuar ftesën e tij për takim.

Në këtë drejtim, shefi i shtetit të Kosovës ka thënë se e pret Kurtin që të takohen me 6 janar, në ora 15:00.

“Duhet të sillemi në mënyrë të përgjegjshme. Nuk mund të sillemi as me hatrime, sepse ato nuk përkojnë me përgjegjësitë kushtetuese që i kemi”, ka theksuar Thaçi.

Duke folur rreth formimit të qeverisë së re të Kosovës, presidenti Thaçi tha se pret që në javët e para të janarit të arrihet implementimi i tij, duke vënë kështu në vend vullnetin e qytetarëve.

“E di për vështirësitë për një arritje të një marrëveshje që janë normale dhe natyrisht partia fituese e përcakton partnerin. Kemi realitet tjetër politik në Kosovës. Çdo marrëveshje e mirëpres dhe do ta shtyj përpara. Është me interes të mos humbet kohë dhe mund të them se Kosova është në një stad të zhvilluar të themelimit të institucioneve dhe çdo marrëveshje që e bëjnë partitë politike do ta mirëpres”, është shprehur ai. /Telegrafi/