Meta: Rruga e Kombit u ndërtua të bashkojë shqiptarët, taksa e panevojshme

Presidenti i Shqipërisë, Ilir Meta, e ka kundërshtuar përsëri vendosjen e taksës doganore ndaj qytetarëve të Kosovës.

Meta, në “Debat Plus” me Ermal Pandurin në një transmetim në RTV Dukagjini dhe ABC News ka thënë se veprimet e njëanshme si ajo e vendosjes së taksës nuk u shërbejnë raporteve mes shqiptarëve.

“Nëse edhe pala e Kosovës do të vendoste taksa, shqiptarët do të ndaheshin edhe më shumë”, tha ai, përcjell Telegrafi.

Presidenti i Shqipërisë ka thënë se Rruga e Kombit u ndërtua të bashkojë shqiptarët.

“Edhe sikur të mos paguhej asnjë euro, por vetëm ndalja te trau i doganës është një bezdi për qytetarët e Kosovës”.

Meta ka thënë se është e vërtet që reagimi i qytetarëve të Kosovës dhe Shqipërisë është më i shpejt se ajo që bëjnë institucionet e dy shteteve.

I pyetur nëse ka krisje në raportet mes presidentëve dhe kryeministrave të Kosovës dhe Shqipërisë, Meta ka refuzuar se ka probleme me presidentin Hashim Thaçi.

Lexo po ashtu Meta: Ndihma nga Kosova më domethënëse, kishin reagim të menjëhershëm

“Me zotin Thaçi kemi komunikime të vazhdueshme. Një nga këshilltarët e mi janë nga Kosova. Jemi në komunikim të përhershëm me institucionet e Kosovës edhe me drejtuesit e opozitës [në Kosovë]. Janë gjëra të parëndësishme gjërat tjera”, tha ndër të tjera Ilir Meta./Telegrafi/