Elezi: ‘TVSH-ja ime’ po i arrin qëllimet, kthehen paratë tek qytetarët

Zëvendësministrja e Financave, Shiret Elezi thotë se ‘TVSH-ja ime’ tashmë po jep rezultatet për qëllimin që është vendosur, ndikon në uljen e ekonomisë gri dhe kthehen paratë tek qytetarët.

Elezi theksoi se përfshirë ditën e djeshme qytetarët kanë realizuar kthimin e mbi 930 mijë euro, duke skanuar thuajse 7 milion llogari fiskale me fitim prej 3.5 milion denarë. Zëvendësministrja Elezi, tha se 143 mijë qytetarë kanë skanuar llogari fiskale, njofton Telegrafi Maqedoni.

“Duke pasur parasysh trendin e rritjes nga dita në ditë të regjistrimit të shfrytëzuesve dhe llogarive të skanuara, presim që numri i llogarive të skanuara në muaj dhe shuma e kthimit në muajt në vazhdim të rritet”, tha Elezi.

Zëvendësministrja theksoi se numri i llogarive të anuluara është ulur për 15% në këtë periudhë, ndërsa është dyfishuar dhe numri i denoncimeve për mos dhënien e llogarive fiskale në krahasim me vitin e kaluar.

Në raport me uljen e ekonomisë gri, Elezi sqaroi se pagesa totale e TVSH-së është përmirësuar për 18.3% në krahasim me vitin e kaluar.

“Pagesa e TVSH-së nga fillimi i korrikut e deri më tani kap shifrën prej 75 milion euro. Kjo është një rritje prej 18.3% në krahasim me vitin e kaluar. Përmirësimi i pagesës së TVSH-së, bashkë me pagesën perfekte të tatimit personal, akcizave si dhe kontributeve – kontribuojnë në mbledhjen e të hyrave për muajin korrik që të jetë më e lartë 16% në krahasim me vitin e kaluar. Me këtë, nga fillimi i vitit e deri më tani të hyrat në buxhetin shtëtëror janë rritur për 7.4% në krahasim me vitin e kaluar -, tha Elezi.

Ajo shtoi se ashtu siç rritet skanimi i llogarive, pritet që edhe pagesa e TVSH të realizojë edhe më shumë rezultate të mira, si dhe të ndikojë në pagesën e të hyrave në buxhetin shtetërorë./Telegrafi/