Hov i madh i rritjes së turizmit në Pejë – hapen dhjetëra biznese hotelerie

Zhvillimi i turizmit dhe ardhjet e mëdha të vizitorëve në qytetin buzë Grykës së Rugovës, ka ndikuar direkt edhe në hapjen e dhjetëra bujtinave në qytetin e Pejës, duke i dhënë kështu një ‘infuzion’ zhvillimit ekonomik të këtij qyteti.

Trendi i rritjes së vizitorëve sipas të dhënave zyrtare, ka një rritje me 31 për qind nga viti në vit, ku vetëm në vitin 2018 Pejën e vizituan mbi 75 mijë turistë.

Sipas drejtoreshës së Drejtorisë për Zhvillim Ekonomik në Komunën e Pejës, Xhenet Syka, janë mbi 130 mijë fjetje që janë regjistruar nëpër bujtinat, hotelet dhe hostelet e qytetit perëndimor të Kosovës.

“Rritja e turizmit në Pejë po ndodhë më hapa shumë të shpejtë, ku nga viti në vit kemi një rritje prej 31 për qind të numrit të vizitorëve. Derisa, trendi i rritjes së numrit të fjetjeve është 15.6 për qind”, ka shtuar ajo.

Sipas saj, këto shifra janë tregues pse pejanët po shfaqin interesim në hapjen e hoteleve, bujtinave dhe restoranteve.

“Sa i përket vizitave, gjermanët prinë për nga numri i turistëve që vizitojnë Pejën, të përcjellë nga anglezët, austriakët, italianët, zviceranët, por që nuk mungojnë edhe vizitorët nga shtetet aziatike dhe ata përtej oqeanit – Shtetet e Bashkuara të Amerikës (SHBA)”, ka theksuar Syka.

Ndryshe, oferta turistike e Pejës bëhet interesante dhe e veçantë për shkak të Grykës së Rugovës, e cila mbetet njëra nga margaritarët e Bjeshkëve të Nemura, e që nxit dëshirën e turistëve për t’i kaluar ditët në këto hapësira të mrekullueshme.

Një segment tjetër që pëlqehet shumë nga vizitorët që kalojnë momentet e tyre në Pejë, është edhe “turizmi i aventurave”, si mundësi për të përjetuar adrenalinën dhe atraksionin në mes të kësaj natyre.

Lexo po ashtu Peja, qyteti që po e rikthen primatin e turizmit në vend – mbi 75 mijë turistë u regjistruan në vitin 2018

Shtegu i ngjitjes nëpër shkëmbinj“Via Ferrata”në një anë, dhe “Zip Line”- shtegu i cili kalohet në ajër, përmes një litari metalik, të shoqëruara me ofertën e monumenteve kulturore dhe historike në Pejë, për Virtyt Gacaferrin, udhëheqës i operatorit turistik “Balkan Nature Adventure”, po e kthen qytetin e Pejës në një oazë të turizmit në Kosovë.

Objektet e trashëgimisë shpirtërore dhe historike, shtoja këtu edhe festivalin e animacionit Anibar, janë pjesa tjetër e ofertës kulturore që e ofron Peja, e cila grumbullon vizitorë nga vende të ndryshme të botës, e të cilët janë në kërkim të gjërave të reja. /Telegrafi/