Lekaj, Haradinajt: Gjithmonë do të jemi bashkë

Nënkryetari i Aleancës për Ardhmërinë e Kosovës, Pal Lekaj ka bërë një reagim pas dorëheqjes së Ramush Haradinajt nga posti i kryeministrit.

Lekaj në një shkrim të bërë në Facebook, ka thënë se Haradinajn e padrejta nuk ka mundur ta ligështojë asnjëherë, sepse sipas tij, atë e ka sfiduar ballëhapur me burrëri si një burrështetas, me nder e sakrificë, transmeton Telegrafi.

“Në krah me ty e fituam paqen, në krah me ty fituam shumë beteja, bashkë me ty e zhvilluam dhe e forcuam shtetin, e bashkë me ty do të dalim fitues edhe në këtë betejë”, ka shkruar Lekaj.

Lexo po ashtu Jep dorëheqje Ramush Haradinaj, ftohet nga Gjykata Speciale

Ai ka thënë se do të jetë gjithmonë me Haradinajn.

Haradinaj gjatë ditës ka dhënë dorëheqje të parevokueshme nga posti i kryeministrit të Kosovës.

Ai ka thënë se shkak i dorëheqjes është thirrja nga Gjykata Speciale.

“Nderi i Kryeministrit dhe Shtetit duhet të ruhet dhe unë nuk e poshtëroj asnjëherë. Në Hagë si Ramush Haradinaj do t’i dal përball shpifësve, ashtu si e kërkon nderi i luftëtarit shqiptar. Pastërtia ime dhe e luftës së UÇK-së, e konfirmuar nga dy aktgjykime nuk mund të njolloset nga askush dhe asnjëherë”, ka thënë Haradinaj.

Haradinaj pritet të udhëtojë gjatë javës së ardhshme për në Hagë./Telegrafi/