Vëllau i Ivanoviqit: Ka shumë politikë në vrasjen e Oliverit, Vuçiqi rrezikoi hetimet kur përmendi emra

Vëllai i politikanit nga Mitrovica, Oliver Ivanoviq, Aleksandar, ka reaguar ndaj deklaratave të presidentit serb Aleksandar Vuçiq, i cili ditë më parë tha se kanë gjetur personin përgjegjës për vrasjen e Oliverit.

Aleksandar Ivanoviq ka deklaruar se nuk e di se kush janë personat që i ka përmendur presidenti serb në një konferencë për media, transmeton Telegrafi.

Megjithatë, si avokat thotë se dëshiron të pyes se mbi çfarë baze apo autorizimi, presidenti i Serbisë ka publikuar në opinion të dhënat e hetimeve të vrasjes së vëllait të tij.

“Publikimi i emrave të dyshuarve pa ndonjë konkretizim të veprimeve të tyre ose aktakuzës, mund të rrezikon rrjedhën e hetimit”, ka deklaruar për mediumin serb Danas, Aleksandar Ivanoviq, vëllai i politikanit të vrarë Oliver Ivanoviq.

Duke komentuar deklaratat e presidentit serb i cili në publik zbuloi emrin e Florim Ejupit, si dikush që po trajtohet si i dyshuar, Ivanoviq ka thënë se po i ngjan më shumë si ikje e përgjegjësisë mes Beogradit dhe Prishtinës.

“Ka shumë politikë në këtë rast, e shumë pak punë profesionale në hetime”, ka shtuar Ivanoviq.

Lexo po ashtu Avokati Halimi flet për akuzat ndaj ish-klientit të tij për vrasjen e Ivanoviqit: Akuzat ndaj Ejupit janë “çorbë” e Beogradit

Ai gjithashtu shtoi se janë të vërteta pretendimet e Vuçiqit, që autoritetet në Prishtinë nuk duan t’ua dorëzojnë pamjet e filmuara të kamerës që mbulon zonën ku ka ndodhur krimi. Megjithatë, thekson se ekzistojnë mënyra që të arrihet edhe deri te ai informacion.

Sipas tij pyetja kyçe është – çfarë ka ndodhur me kamerat e tjera që mbulojnë pjesën veriore të Mitrovicës?

“Sipas gjithë asaj që kemi parë, vrasja e Oliver Ivanoviqit është kryer nga profesionistë. Atyre u janë dashur ditë të tëra që ta “skanojnë” terrenin, kurse dikush është dashur t’i ndihmojë vrasësit të largohen nga ajo zonë. Pamjet e filmuara nga ato kamera do të mund të jepnin përgjigje në këtë, kurse janë pikërisht serbët që i kontrollojnë ato kamera”, ka shtuar Ivanoviq.

Kujtojmë që presidenti serb Vuçiq gjatë një konference për media ka deklaruar se ekzistojnë indikacione se në vrasjen e Oliver Ivanoviqit ka marrë pjesë Florim Ejupi, duke shtuar se është duke u punuar në mbledhjen e dëshmive materiale.

Por këto informata i ka demantuar avokati Mahmut Halimi, i cili në një prononcim për Telegrafin këto akuza të rënda për ish-klientin e tij, i ka quajtur trillim dhe çorbë të Beogradit, që siç tha ai, nuk po mund të dalë kurrsesi nga përgjegjësia për vrasjen e Ivanoviqit. Avokati Halimi ka thënë se ndaj ish klientit të tij nuk ka asnjë procedurë ndaj tij. /Telegrafi/