Pacolli: Kosova mirëpret udhëheqjen e re të Bashkimit Evropian

Ministri i Punëve të Jashtme të Kosovës, Behgjet Pacolli, ka thënë se Kosova mirëpret udhëheqjen e re të Bashkimit Evropian.

Ai ka thënë se pret të vazhdohen marrëdhëniet e mira me Bashkimin Evropain, dhe se çelësi i marrëdhënieve mbetet të liberalizimi i vizave, ku pret që BE të marrë vendimin dhe të vazhdohet dialogu me Serbinë dhe procesi i zgjerimit të mos ndalet.

Lexo po ashtu Kush janë të nominuarit për pozitat kyçe të BE-së dhe 6 hapat e mbetur drejt institucioneve të reja

Pacolli ka theksuar se, Kosova është një vend që synon të ketë marrëdhënie të mira me të gjitha vendet, përfshirë Spanjën, transmeton Telegrafi.

Shkrimi i plotë i Pacollit në Facebook:

“Kosova mirëpret udhëheqjen e re të Bashkimit Evropian. Ne besojmë se nuk varet nga origjina kombëtare roli që dikush do të luajë në Bashkimin Evropian dhe politika e jashtme e Bashkimit Evropian varet nga shtetet anëtare nga të cilat shumica e kanë njohur Kosovën. Presim që ne do të vazhdojmë të forcojmë marrëdhëniet me BE edhe pse BE po kalon momente të vështira, çelësi i marrëdhënieve tona mbetet liberalizimi i vizave ku presim që BE të marre vendimin, të vazhdojë dialogu me Serbinë dhe procesi i zgjerimit të mos ndalet.

Ne presim që Bashkimi Evropian të marrë një vendim për liberalizimin e vizave për Kosovën. Çdo vonesë e mëtejshme nuk ka arsye. Sikurse ka konfirmuar Komisioni Evropian dhe Parlamenti, Kosova ka përmbushur të gjitha kriteret për liberalizimin e vizave dhe nuk duhet të ketë arsye politike që pengojnë këtë proces teknik. Ne jemi duke punuar me të gjitha shtetet anëtare për t’u shpjeguar atyre nevojën për dhënien e udhëtimit të lirë në Kosovë. Çdo vonesë do të dëmtojë kredibilitetin e BE-së në Kosovë dhe rajon dhe do të tregojë se reformat zbatuese dhe standardet e kërkuara nga BE nuk paguhen. Kjo është e dëmshme për të ardhmen evropiane dhe forcën e BE-së.

Kosova është një vend që synon të ketë marrëdhënie të mira me të gjitha vendet, përfshirë Spanjën. Ne i kemi kërkuar qeverisë spanjolle të njohë Kosovën dhe të mbështesë rrugën e Kosovës drejt konsolidimit ndërkombëtar dhe integrimit evropian. Fatkeqësisht, për shkak të arsyeve që nuk kanë të bëjnë me Kosovën, pozicioni spanjoll ka qenë një vijë e ashpër ndaj Kosovës. Ne presim dhe po punojmë me të gjithë aktorët dhe vendet për të forcuar marrëdhëniet e Kosovës me ta”./Telegrafi/