Agjenti i Kramaric thotë se Milani e do futbollistin kroat

Agjenti i Andrej Kramaric ka konfirmuar se Milani është i interesuar në transferimin e sulmuesit të Hoffenheimit, derisa Zvonimir Boban po ndikon në marrëveshje.

Sulmuesi kroat kishte paraqitje fantastike në sezonin që lamë pas, duke shënuar 22 gola për skuadrën gjermane, e cila përfundoi në mesin e tabelës.

Vincenzo Cavaliere ka thënë se 27-vjeçari është rrugës për t’u larguar nga Hoffenheimi, sidomos pas interesimit të Milanit.

“Kramaric ka zgjuar interesimin e Milanit, por edhe disa klubeve të tjera evropiane, pasi që është shndërruar në një lojtar që shënon shumë gola”, ka thënë agjenti i kroatit.

“Në Gjermani, ai është në mesin e sulmuesve që kanë shënuar më së shumti gola në dy sezonet e fundit, edhe pse nuk luan për Bayern Munichun apo Borussia Dortmundin”.

Lexo po ashtu Milani po mendon t'i shesë Castillejon dhe Laxaltin

“Rossonerët aktualisht kanë angazhuar Bobanin, bashkëkombësin e Kramaric, andaj do të shohim nëse do të realizohet marrëveshja”, ka shtuar më tej Cavaliere.

Nëse Milani arrin ta transferojë sulmuesin kroat nga Hoffenheimi, atëherë do të paguajnë rreth 30 milionë euro për shërbimet e tij. /Telegrafi/