PDK, përgëzon institucionet e drejtësisë për kthimin e shtetasve të Kosovës nga Siria

Partia Demokratike e Kosovës ka përgëzuar institucionet e drejtësisë dhe partnerët ndërkombëtarë, për kthimin e kosovarëve që kanë qenë në zonat e luftës në Siri.

Në një njoftim për media thuhet se Republika e Kosovës, ka dëshmuar maturinë e vet për t’i dalë në ndihmë secilit qytetar, duke mos i braktisur ata.

Sipas njoftimit, PDK vlerëson se shoqëria e Republikës së Kosovës dhe institucionet e saj kanë qenë jashtëzakonisht të vendosura në parandalimin dhe luftimin e terrorizmit.

“Partia Demokratike e Kosovës, përshëndetë operacionin e institucioneve të sistemit të drejtësisë dhe sigurisë si dhe ndihmën e partnerëve ndërkombëtar për kthimin e qytetarëve të Republikës së Kosovës që kanë qenë në zonat e luftës në Siri. Sot, Republika e Kosovës ka dëshmuar maturinë e vet për t’i dalë në ndihmë secilit qytetar, duke mos i braktisur ata. Partia Demokratike e Kosovës, vlerëson se shoqëria e Republikës së Kosovës dhe institucionet e saj kanë qenë jashtëzakonisht të vendosura në parandalimin dhe luftimin e terrorizmit si dhe duhet të vazhdojnë edhe më tej me vendosmëri që të zbatojnë parimet e rendit tonë kushtetues dhe ligjor kundër çdo aktiviteti dhe personi që tenton, merr pjesë apo kryen vepra penale të kësaj natyre”, thuhet në njoftim.

Tutje në njoftimin e zyrës për informim të PDK-së, thuhet se fëmijët e Republikës së Kosovës e kanë vendin në shkolla dhe e ardhmja e tyre nuk mund të manipulohet nga askush.

“Në anën tjetër, kthimi i qytetarëve tanë nga zonat e luftës, veçanërisht i grave dhe fëmijëve është një hap që duhet të na inkurajojë për të punuar edhe më shumë që asnjëherë më qytetarët tanë të mos jenë viktimë e personave të papërgjegjshëm dhe të përfundojnë në vatrat e luftërave të huaja mbi çfarëdo lloj pretendimesh. Partia Demokratike e Kosovës përgëzon Ministrin e Drejtësisë, Abelard Tahiri për lidershipin e tij në realizimin e këtij aktiviteti të rëndësishëm dhe human për shtetin dhe shoqërinë tonë. Qytetarët e kthyer nga zonat e luftës, kanë kaluar periudha traumatike dhe ne si shoqëri duhet të kemi mirëkuptim, të kontribuojmë në rehabilitimin e tyre si dhe integrimin e tyre në jetën tonë shoqërore. Fëmijët e Republikës së Kosovës e kanë vendin në shkolla dhe e ardhmja e tyre nuk mund të manipulohet nga askush. Ky parim sot është bërë realitet dhe është kursi i duhur që duhet të ndjekim si shoqëri e përkushtuar për një rend liberal, e bazuar mbi vlerat më të larta të mirëkuptimit, tolerancës, demokracisë dhe shtetit të së drejtës”, thuhet në njoftimin për media, nga zyra për informim të PDK-së. /Telegrafi/