OBRM-PDUKM: Pushteti në vend të reformave, tregton me interesat kombëtare dhe shtetërore

Partia opozitare maqedonase OBRM-PDUKM, përmes një kumtese për media thekson se kryeministri Zoran Zaev dhe kandidati për kryetari shteti Stevo Pendarovski, janë të njëjtë.

Nga kjo parti thonë se Maqedonia nuk mund të lëvizë asnjë milimetër drejt BE-së, derisa pushteti në vend që të punojë dhe zbatojë reforma, tregton me interesat kombëtare dhe shtetërore.

“Personalisht Zoran Zaev e pranoi se gjatë gjithë vitit është duke i gënjyer qytetarët. Fillim të negociatave me BE-në në qershor mund edhe të mos ketë. Këtë personalisht e tha Zoran Zaev, politikani i cili premtoi se menjëherë pas ndryshimit të emrit Republika e Maqedonisë së Veriut do të lëvizë në rrugën drejt BE-së. Rregullat e BE-së janë të qarta. Fillimisht reforma, pastaj negociata. OBRM-PDUKM shpreh brengosje serioze, se reformat me këtë pushtet nuk janë të mundura”, thonë nga partia opozitare.

Ata theksojnë se Maqedonia ka nevojë për njeri të ndershëm dhe të vyeshëm për president, duke shtuar se Gordana Siljanovska është zgjidhja e duhur./Telegrafi/