Gentian Mezani gati për ta filluar aventurën te Gjilani: Duan fitore në shtëpi

Gentian Mezani është gati ta nis aventurën e tij si trajneri i Gjilanit në Superligën e Kosovës, ndërsa ka folur për përgatitjet dhe punën që skuadra po bën për vazhdimin e kampionatit.

Ai u shpreh i kënaqur me punën dhe përkushtimin e futbollistëve të tij gjatë kësaj kohe sa ai ka punuar me ta.

“Përgatitjet kanë qenë mendoj të kënaqshme, kam parë shumë dëshirë nga ana e lojtarëve gjatë këtyre ditëve”, u shpreh fillimisht Mezani.

Numri një i bankinës së kuq e bardhëve, vijoi duke thënë se ata e kanë detyrim që ndeshjet si vendas të dalin triumfues, duke thënë se edhe barazimi si vendas për ta është sikurse humbja.

“Mendoj që në takimin e radhës është detyrë e jona të fitojmë sepse këtë gjë ua kam thënë dhe lojtarëve, ndeshjet në Gjilan dhe barazimi për ne është humbje, në qoftë se do të futemi me mentalitetin e duhur mendoj qe gjërat do të jenë më të lehta, ama po menduam ndryshe do të jetë e vështirë”, vijoi tutje Mezani.

Ai në fund ka një porosi edhe për tifozët e skuadrës, ku ndër të tjera ai tha se skuadrës në këto momente i duhet mbështetja maksimale e tyre.

“Mendoj që në këto momente tifozëria duhet të jetë lojtari i 12 sepse lojtarët kanë nevojë për ta duke parë dhe pozitat ku jemi, kur gjërat venë mirë skuadra luan vetë, ama në këto momente nevojitet prania sa më e madhe e tyre dhe mbështetja e tyre, sepse në fund të fundit lojtarët dhe trajnerët shkojnë e vinë, ama skuadra është e tyre, është e qytetit”, përfundoi kryetrajneri i Gjilanit, Gentjan Mezani. /Telegrafi/