Prokurori jep detajet për vrasjen e të riut në Lipjan, policia në kërkim të vrasësit

Komandanti i Stacionit të Policisë në Lipjan dhe prokurori i Prokuorisë së Krimeve të Rënda në Prishtinë, kanë dhënë detaje për vrasjen e një të riu sonte në një lokal në Lipjan, ku ishte duke punuar viktima.

Komandant i Policisë në Lipjan, Driton Imeri, ka thënë se vrasja e personit është lajmëruar nga të afërmit sepse nuk po përgjigjej në telefon.

Sipas tij, pasi që Policia ka arritur në vend të ngjarjes viktimën e ka gjetur pa shenja jete prapa banakut në lokal.

“Rreth orës 20:10 stacioni policor në Lipjan e ka pranuar një telefonatë se punëtori që ka qenë duke punuar në këtë lokal nuk po lajmërohet në telefon. Njësitet policore iu kanë përgjigjur thirrjes dhe së bashku me sigurimin e kanë parë që dera e hyrjes së lokalit nuk hapej dhe nuk kanë mundur të hyjnë brenda. Me forcë e kanë hapur derën dhe brenda në lokal prapa shankut e kanë gjetur një person të shtrirë në tokë pa shenja jete, e konfirmuar pastaj nga mjeku kujdestar. Menjëherë janë thirrur të gjitha njësit relevante. Personi që ka humbur jetën është i gjinisë mashkullore rreth 30 vjeçar”, ka thënë komandanti i Policisë, raporton Telegrafi.

Prokurori kujdestar i Prokurorisë së Krimeve të Rënda në Prishtinë, Armend Hamiti, ka folur për vrasjen e një personi në një lokal në Lipjan.

Lexo po ashtu Vritet një person në Lipjan

Hamiti ka thënë se për momentin janë shpërndarë njësitet në teren për ta identifikuar personin që ka kryer vrasjen.

“Vdekja është e dhunshme. Tani janë shpërndarë njësitet policore në teren që të identifikohet personi emri i të cilit nuk dihet, por që shihet pak në kamerë. Nëse ka nevojë ndihma e qytetarëve, ne do t’ iu drejtohemi mediave. Kualifikimi i parë për rastin është grabitje me pasojë vdekjen”, ka thënë prokurori, duke mos dhënë detaje të tjera.

Ndryshe rreth orës 20:00 Policia ka marrë informatën se në një lokal në rrugën “Bajram Gashi” në Lipjan gjendet një person pa shenja jete. Sipas Policisë së Kosovës, personi është mashkull 36 vjeç./Telegrafi/.