Begu: Kosova ka për obligim të krijojë një vizion të qartë për teknologjinë informative (Video)

Drejtori ekzekutiv i Qendrës Kosovare për Inovacion (ICK), Uranik Begu, ka thënë se vendi ynë ka për obligim të krijojë një vizion të qartë ekonomik, veçanërisht për sektorin e teknologjisë informative.

Begu në një intervistë në Telegrafi.com, thotë se përkundër pengesave, Kosova në nivel rajonal qëndron shumë mirë.

“Për kundër pengesave, në rajon jemi zhvilluar shumë mirë. ICK në vendet e rajonit ka marr një grant më të mirë për shkak të mundësive që ta realizoj dhe kërkesave që janë bërë. Në rajon duhet të funksionojmë si një, mirëpo edhe si Kosovë duhet ta gjejmë atë pikën konkurruese edhe brenda sektorit të TIK-ut. Të rinjtë duhet ta gjejnë vetën dhe besoj se më një mbështetje si ICK, është e vetmja formë që ta mbajmë rininë këtu”, tha Begu.

Ai ka shtuar se shteti është bartës i vizionit për zhvillim, sipas tij, Kosova ka për obligim që ta krijoj një vizion të qartë ekonomik.

“E para është krijimi i një vizioni të qartë dhe besoj që shteti e ka për obligim që ta krijoj një vizion të qartë e ku sigurisht TIK-u është aty. E dyta është rritja e buxhetit, në veçanti në edukim profesional jo vetëm për fushat të cilat janë, por edhe për kërkesat e tregut global. Në këtë drejtim edhe një partneritet publiko-privat. Zhvillimi vjen vetëm në këtë formë, ku shteti është bartës i vizionit dhe garantues i atij vizioni, kurse ne të tjerët jemi akterë që ndihmojmë zhvillimin”, ka shtuar ai.

Lexo po ashtu Begu: Kosova ka potencial të madh në fushën e teknologjisë informative, duhet përkushtim më i madh institucional (Video)

Begu tha se duhet të jetë një koordinim më i mirë i donatorëve.

“Po ashtu, duhet të jetë një koordinim më i mirë i donatorëve. Është momenti i fundit që shteti ta krijoj një vizion të qartë dhe t’i thotë donatorëve kjo është Kosova që kemi ne. Kjo vjen me një kompromis ekonomik, atëherë do ta bënte shumë më të lehtë rrugëtimin për të gjithë ne. Besoj se kjo është rruga e vetme”, tha Begu.

Në intervistë, ai ka folur edhe për rolin e diasporës në fushën e teknologjisë informative, për potencialin që ka Kosova në këtë fushë si dhe për bashkëpunimet rajonale. /Telegrafi/