Seanca gjyqësore për lëndët e PSP-së “Lëndina”, “Titanik”, “Dhuna në Qendër” dhe “Spiuni”

Në Gjykatën Penale në Shkup për sot janë planifikuar seanca gjyqësore për lëndët e Prokurorisë Speciale “Lëndina”, “Titanik”, “Dhuna në Qendër” dhe “Spiuni”.

Në rastin “Lëndina” të akuzuar janë Dragan Pavlloviq-Llatas dhe vëllezërit e tij Srgjan dhe Zvezdan për ndërtim pa leje të tre shtëpizave në Zelenikovë, përcjell Telegrafi Maqedoni.

Në rastin “Titanik” deri tani në gjykatë janë prezantuar 1800 nga 5900 dëshmi materiale, të propozuara nga PSP-ja. Janë prezantuar, letërnjoftmme, deklarata të personave të autorizuar, fatura, vërtetime dhe dokumente tjera.

Në këtë lëndë e cila ka të bëjë me mashtrime zgjedhore, të akuzuar janë Nikolla Gruevski, Mile Janakieski, Gordana Jankulloska dhe disa persona të tjerë.

Në rastin “Dhuna në Qendër” në të cilin të akuzuar janë 14 persona, mes të cilëve edhe Nikolla Gruevski, në seancën e fundit fajin e pranuan i akuzuari i katërt dhe i pestë, Tomisllav Llazarov dhe Jordan Ristevski. Kjo lëndë ka të bëjë me protestat para Komunës Qendër, në të cilat është përdorur edhe dhunë.

Sot gjithashtu do të mbahet seancë edhe për rastin “Spiuni”. Në procedurën e parë në këtë rast u dënuan 19 persona. Dënimin më të lartë e mori i dyshuari i parë Marjan Efremov, ndërsa në mesin e të dënuarve për bashkëpunim me shërbimet sekrete të jashtme janë edhe ish-shefi i njësitit “Luanat”, Goran Stojkov, ish-drejtori i Drejtorisë për parandalim të larjes së parave Vane Cvetanov dhe ish-funksionari i lartë në DSK, Aleksandar Dinevski./Telegrafi/