Belegu: Theksi kryesor në letrën e Haradinajt është se nuk ka shkëmbim të territoreve

Kryeministri i Kosovës, Ramush Haradinaj u ka dërguar sot letër të gjithë kryeministrave të botës, kurse dje u kishte dërguar letër vendeve anëtare të Quint-it. Këshilltari i kryeministrit, Eroll Belegu, tregoi se përse i pari i Qeverisë ka vendosur që t’i dërgojë këto letra.

Sipas Belegut, kryeministri Haradinaj është detyruar që t’i dërgojë letër vendeve të Quint-it si pasojë e presionit që ka pasur Kosova nga komuniteti ndërkombëtar.

“Në vazhdimësi në kohën e fundit prej që është vendosur taksa ne kemi pasur presion prej komunitetit ndërkombëtar, i njëjti komunitet, i cili nuk ka reaguar në asnjë moment gjatë tërë kohës që Serbia ka bërë padrejtësi drejt Kosovës, qoftë në luftën diplomatike, tërheqjes së njohjeve… barrierave tregtare. Kur po flasë për Serbinë po i referohem edhe Bosnjës njëkohësisht, sepse pak a shumë e kanë mbajt të njëjtën vijë çdoherë. Dhe kur tërë kjo kërkesë apo tërë ky vrull i kërkesave ka ardhur nga Bashkësia Ndërkombëtare edhe realisht ka pasur edhe këtu partitë opozitare po e them kushtimisht po ndoshta edhe në prononcimet e kohë pas kohshme edhe ato me të cilët jemi partner kanë filluar pak a shumë që të dorëzojnë të them këtë pozicionin e fuqishëm që të gjithë e kemi pas rreth taksës. Thjesht kryeministri është detyru që të gjithë shteteve të Quint-it t’iu dërgojë një ofertë, e cila në asnjë moment nuk guxon të edhe pse toni i ofertës mund të pajtohem që është pak më i rreptë ndoshta se që duhet, por megjithatë ajo çka përmban ajo ofertë është kushtet me të cilat ne jemi të gatshëm me largu taksën.”, është shprehur ai.

Lexo po ashtu Haradinaj u shkruan homologëve botëror: Statusi dhe territori i Kosovës, nuk janë pjesë e dialogut

Belegu ka treguar që kushtet e paraqitura në letër kanë të vetmen kërkesë dhe ajo është njohja nga Serbia.

“Në parim ato, nëse i lexoni të gjitha e përbëjnë vetëm një fjali të cilën kryeministri e ka thënë prej ditës së parë. E, kjo është ne kërkojmë njohje. Realisht të gjitha ato tjerat të cilat janë nëpërmjet asaj letre kanë të bëjnë me njohjen. Natyrisht mos të harrojmë që apostrofimi kryesor në letër është ai që nuk ka shkëmbim të territoreve dhe ne kërkojmë garancat nga faktorët ndërkombëtar që nuk do të ketë ndryshim të territoreve dhe forma si do të arrihet është propozu si një konferencë. Po mos të harrojmë që ajo konferencë realisht është më shumë që të jetë e përgatitur. Tash, a e ka emrin ajo konference apo do të jetë një mbledhje më e gjatë. A do të jenë pesë takime brenda atyre 14 ditëve apo 13 ditëve apo 10 ditëve. Po sidoqoftë nuk mendoj që duhet të ndodhë ajo çfarë ka ndodhur deri sot. Të shkojmë në negociata me duar në xhepa dhe të bisedojmë duke mos e pasur lëndën për të cilën do të diskutojmë përpara”, ka thënë Belegu, në emisionin “Click” të RTV21.