Vazhdon përplasja e ‘Jelekëve të Verdhë’ me policinë

Përplasje janë shënuar sërish, këtë herë në mbarë Francën gjatë së shtunës, teksa rreth 84 mijë demonstrues të mbiquajtur tashmë “Jelekët e Verdhë” dolën nëpër rrugët e vendit për të dhjetën fundjavë radhazi, në protestat kundër qeverisë së presidentit Emmanuel Macron.

Demonstratat kaluan kryesisht të qeta në Paris, ku ishin mbledhur rreth 7 mijë vetë, edhe pse reporterë të Reuters kanë xhiruar disa përplasje të lehta mes policisë dhe demonstruesve, disa prej të cilëve edhe me maska, në zonën Invalides të kryeqytetit francez.

Protestuesit hodhën fishekzjarre, shishe dhe gurë drejt policisë, me këtë të fundit që u kundërpërgjigj me gaz lotsjellës dhe topa uji për t’i zmbrapsur. “Macron, dorëhiqu!” ishte thirrja e disa prej protestuesve.

Lexo po ashtu Protestat në Francë, katastrofë për ekonominë e vendit

Protestat e “Jelekëve të Verdhëve”, që morën këtë emër pikërisht prej jelekëve të verdhë që drejtuesit e mjeteve duhet të mbajnë me detyrim në automjetet e tyre, nisën në nëntor me në fokus kundërshtinë ndaj rritjes së planifikuar të taksave të karburantit. /Telegrafi/