Në 29 vjetorin e themelimit të LDK-së, kryesia e partisë bën homazhe te varri i Ibrahim Rugovës

Kryesia e Lidhjes Demokratike të Kosovës dhe strukturat e saj me rastin e 29 vjetorit të themelimit të partisë kanë bërë homazhe te varri i themeluesit dhe ish-presidentit të Kosovës, Ibrahim Rugova.

Anëtari i kryesisë së LDK-së, Sabri Hamiti tha se sot janë mbledhur ta përkujtojnë liderin e tyre të ndjerë, e njëherësh, siç e quajti ai, edhe themeluesin e pavarësisë së Kosovës.

Hamiti tha ndër të tjerash që Rugova la pas vetes standarde të larta, që sipas tij duhet të ndiqen nga të gjithë.

“Është e natyrshme dhe e domosdoshme që të bëhen nderimet për themeluesin e LDK-së dhe themeluesin e pavarësisë së Kosovës. Ibrahim Rugova, që në nismë të organizimit të tij politik në Kosovë, ka krijuar standarde të larta të cilat duhet të ndiqen edhe nga LDK-ja, unë mendoj edhe nga qytetarët e Kosovës edhe nga organizimet e tyre. Ai ka krijuar standarde edhe për mënyrën e komunikimit, edhe për mënyrën e komunikimit në organizim politik, se solidariteti është domosdoshmëri në organizimet e rëndësishme nacionale”, ka thënë Hamiti.

Ai  tha se pavarësisht ndryshimeve gjatë këtyre tri dekadave, normat rugoviane në LDK kanë mbetur të njëjtat, për të cilat tha se janë bërë premisa të zhvillimit dhe veprimit të kësaj partie.

“Do të ishte absurde të thuhet se LDK është si para 29 viteve. Jo, nuk mund të jetë e njëjtë. Edhe këto fjalë që i thashë në fillim, u përpoqa të them se standardet, normat, kriteret e veprimit, LDK-ja s’mund t’i ketë tjera përpos këtyre. Veprimi politik dhe lëvizjet shoqërore në Kosovë janë krejt të tjera. Brezat ndërrojnë, secili e ka sensibilitetin e vet. Çështja është që organizimet e tilla duhet të veprojnë në kohë, në rrethana që nuk janë njësoj, por standardet duhet të ruhen”, ka deklaruar Hamiti.

Pas homazheve te varri i Rugovës, LDK ka vazhduar me një manifestim kushtuar 29 vjetorit të themelimit.