Tahiri: 2019-ta, vit i konfiskimit të pasurive të paligjshme dhe shkatërrimit të grupeve kriminale

Ministri i Drejtësisë, Abelard Tahiri është i bindur që gjatë vitit 2019 do të fillojë konfiskimi i pasurisë së zyrtarëve të lartë dhe do të shkatërrohen grupet kriminale.

Tahiri thotë se është bërë avancim i ligjeve në sistemin e drejtësisë dhe që nga momenti që do të hyjnë në fuqi, gjyqtarët dhe prokurorët do të kenë instrumente për luftimin e korrupsionit dhe pasurisë së fituar jashtëligjshëm.

“Besoj që viti i ardhshëm të jetë më i fuqishëm në luftimin e këtyre dukurive, sepse janë ngritur kapacitetet brenda gjyqësorit, prokurorisë, kemi bërë avancim të ligjeve. Mendoj që do të jetë prioritetit im që të konfiskohen pasuritë që janë fituar paligjshëm”, tha Tahiri për Ekonomia Online.

“Në momentin që hyn në fuqi pas gazetës zyrtare sepse është çështje ditësh, dhe prokurorët dhe gjyqtarët kanë instrumente të veprojnë për zbatimin e këtyre ligjeve. Viti 2019 do të jetë vit që do të tregojmë suksese  edhe më të mëdha në konfiskimin e pasurisë së paligjshme, në shkatërrimin e grupeve të krimeve, që janë marrë me haraç e fajde”, tha Tahiri .

Tahiri shton se është përmbushur, kushti i fundit për liberalizim të vizave, që është luftimi i krimit të organizuar dhe korrupsionit.

Sipas tij, ka një mekanizëm përcjellës ku janë vendosur rastet e shënjestruara për liberalizimi.

Sa i përket deklaratës së ambasadorit të Shteteve të Bashkuara të Amerikës, Philip Kosnett, se ligjet nuk mjaftojnë për luftimin e korrupsionit, por duhen veprime, në linjë me këto deklarime është edhe ministri i Drejtësisë, Abelard Tahiri.

Ai pohon se ishte shqetësim edhe i tij, se në Kosovë nuk është luftuar kënaqshëm korrupsioni dhe krimi i organizuar.