Reali shokohet nga Eibari, Solari përjeton humbjen e parë

Real Madridi ka pësuar një humbje të thellë në udhëtim te Eibar me rezultat 3-0.

Ndeshja nisi mirë për Realin që shënuan vetëm pas gjashtë minutash, por që goli i Bale u anulua për pozitë jashtë loje.

Në minutën e 11-të, Karim Benzema pati një rast të artë, por portieri vendas Riesgo intervenoi mirë për t’ia mohuar golin.

Vendasit në rastin e parë të mirë arritën të shënonin gol, kur në minutën e 16-të pas dy tentimeve realizoi Gonzalo Escalante.

Me epërsinë minimale të vendasve 1-0 përfunduan 45 minutat e para të kësaj sfide.

Pjesa e dytë nisi edhe më mirë për vendasit të cilët realizuan edhe një gol.

Marc Cucurella asistoi bukur tek Sergio Enrich i cili shënoi në portën e Courtois për 2-0.

Pasi kaluan pesë minuta, Eibar realizoi edhe golin e tretë dhe të nokautit për ekipin e Santiago Solarit.

Ishte sulmuesi spanjoll Garcia Kike që nga afërsia shënoi për 3-0.

Kjo ishte humbja e parë e Realit nën drejtimin e trajnerit argjentinas, Santiago Solari.

Pas kësaj humbje, Reali vazhdon të mbetet në pozitën e gjashtë në tabelë me 20 pikë të grumbulluara pas 13 ndeshjeve.

Në anën tjetër Eibar pas këtyre tri pikëve të arta është ngritur në pozitën e shtatë me 18 pikë.

Ndeshjen e ardhshme Los Blancos do ta zhvillojnë në shtëpi përballë Valencias. /Telegrafi/