Lëvizja Besa: Buxheti i vitit 2019 është diskriminues për shqiptarët

Nëpërmjet një konference për shtyp të Lëvizjes Besa të krahut të Kasamit, thonë se ky propozim buxhet, nuk parasheh rritje të investimeve kapitale në proporcion me rritjen e buxhetit.

“Qeveria si propozues, me matematikat e saja ambicioze në përpilimin e propozim buxhetit, nuk është mbështetur në realitetin faktik që kemi në shtet. Edhe pse qeveria po proklamon buxhet social, ajo nuk i përmbahet premtimit të saj, pasi rritjen e rrogave nuk e parashikon ashtu si ka premtuar”, thonë nga Lëvizja Besa, njofton Telegrafi Maqedoni.

Sipas Lëvizjes Besa, për shqiptarët edhe ky propozim buxhet, si edhe propozim buxhetet e kaluara, nuk përmbush nevojat dhe kërkesat e tyre, duke nisur nga procesi i decentralizimit, i cili nuk është përmbyllur me sukses.

“Si rezultat i kësaj, sot komunat ballafaqohen me mungesë të mjeteve për financim të projekteve dhe me këtë vështirësohet puna e tyre. Vet fakti i faljes së borxheve të komunave nga ana e qeverisë me ligj të veçantë, tregon gjendjen e rëndë në të cilën funksionojnë ato. Këtu duhet të potencojmë se këto borxhe, komunat i kanë krijuar në mënyrë jotransparente dhe jo në interes të qytetarëve” theksojnë nga Lëvizja Besa./Telegrafi/