Haradinaj mbështet projekt-rezolutën e AAK-së për shtesat e fëmijëve

Kryeministri i Kosovës, njëherësh edhe lideri i AAK-së, Ramush Haradinaj ka thënë se AAK si parti politike, gjithmonë i është dedikuar politikave familjare dhe përkrahjes së zhvillimit të tyre.

Përmes një postimi në Facebook, Haradinaj ka shkuar se si kryeministër i Kosovës, beson se iniciativa e AAK-së për shtesat e fëmijëve do të mbështetet nga të gjitha partitë politike.

Lexo po ashtu Kadaj-Bujupi: Çdo fëmijë deri në 16 vjeç të gëzojë shtesa

Postimi i plotë:

Si parti politike, Aleanca për Ardhmërinë e Kosovës, gjithmonë i është dedikuar politikave familjare dhe përkrahjes së zhvillimit të tyre. Jam i lumtur që sot, AAK ka dorëzuar në Kuvendin e Kosovës projekt-rezolutën për shtesat për të gjithë fëmijët e Kosovës. Si Kryeministër i vendit, besoj që kjo iniciativë do të mbështetet nga të gjitha partitë politike.

Kjo projekt-rezolutë parasheh që çdo fëmijë në Republikën e Kosovës prej moshës 0-16 vjeç të gëzojë shtesa, çdo muaj, duke filluar nga 10 euro, pastaj sipas mundësive buxhetore, kjo shumë edhe mund të rritet. Bëhet fjalë për rreth 500 mijë fëmijë në tërë Kosovën që do ta gëzojnë këtë të drejtë.

Projekt-rezoluta për shtesat e fëmijëve është një nga hapat e Qeverisjes sime për të zhvilluar politika të qëndrueshme në mbrojtjen e fëmijëve dhe familjes. /Telegrafi/