Thaçi i kundërpërgjigjet Haradinajt: Thirrjet për tragjedi e luftë në Ballkan, meritojnë të hidhen në shportë

Presidenti i vendit, Hashim Thaçi ka folur sërish për çështjen e shkëmbimit të territoreve.

Thaçi i ka reaguar edhe kryeministrit Haradinaj i cili më herët tha se ideja për shkëmbim të territoreve është thirrje për tragjedi në Ballkan.

“Thirrjet për luftë dhe tragjedi të reja në Ballkan i takojnë mentalitetit të shekullit të kaluar dhe si të tilla, meritojnë vetëm të hidhen në shportë”, ka shkruar Thaçi.

Lexo po ashtu Haradinaj kundërshton ashpër idenë e shkëmbimit të territoreve, thotë se është ftesë për tragjedi të reja në Ballkan

Postimi i plotë:

Të gjitha shtetet perëndimore, aleatët tanë, garantuesit e paqes dhe sigurisë në Ballkan po bëjnë përpjekje dhe thirrje për paqe, stabilitet dhe arritje të marrëveshjes përfundimtare ndërmjet Kosovës dhe Serbisë. Kjo marrëveshje nënkupton njohje reciproke dhe perspektivë të sigurt të anëtarësimit të Kosovës në BE, NATO dhe OKB. Por, fatkeqësisht, individë të caktuar në vendin tonë, me veprimet e tyre po tentojnë të krijojnë panik dhe konfuzion. Kosova, përkundër kësaj, mbetet e përkushtuar për dialog dhe arritje të marrëveshjes paqësore përfundimtare. Thirrjet për luftë dhe tragjedi të reja në Ballkan i takojnë mentalitetit të shekullit të kaluar dhe si të tilla, meritojnë vetëm të hidhen në shportë.