Juncker: Evropa po humb fuqinë në skenën botërore

Presidenti i Komisionit Evropian, Jean-Claude Juncker, tha se “Evropa po humb fuqinë në skenën botërore, po mendojmë se jemi padroni i botës, por në të vërtetë ne harrojmë që ne jemi një pjesë e vogël dhe e dobët e universit”.

Juncker ka folur për gazetën holandeze “Trow”, përcjell Telegrafi, ku bëri deklarata në lidhje me ekonominë e BE-së, situatën demografike dhe marrëdhëniet me Rusinë.

Ai ka theksuar se Evropa dhe Rusia duhet të fokusohen se si të formojnë sërish lidhjet duke lënë pas retorikën e Luftës së Ftohtë, duke shtuar se “Shoku im Putin, pavarësisht se askush nuk ka guximin të shprehet sot ‘shoku im Putin’ ne jemi shokë që prej shumë vitesh”.

Sipas tij, Rusia është më shumë se një fuqi rajonale dhe tha se “duhet të mësojmë të flasim si të barabartë me rusët”.

Pasi ka tërhequr vëmendjen se Evropa ka rënë si një fuqi ekonomike dhe ka humbur fuqinë e saj demografike, Juncker tha se “Jemi të pranishëm nga pikëpamja kulturore, por nuk jemi dominues. Për këtë arsye unë i ftoj të gjithë që të jenë më modestë dhe të dëgjojnë pjesën tjetër të botës”. /Telegrafi/