Teknologjia zbeh imazhin e librit!?

Zhvillimi i hovshëm i teknologjisë ka bërë që lexueshmëria e librit të bie. Kjo u tha në Ditën Botërore të Librit dhe të të Drejtave të Autorit, në Bibliotekën Kombëtare të Kosovës, ku nxënës të shkollave fillore dhe të mesme të ulëta ishin mbledhur për të prezantuar krijimet e tyre letrare.

Udhëheqësja e Departamentit të Edukimit Bibliotekar, Ramize Bajraktari, tha se mungesa e lexueshmërisë së librave dhe zëvendësimi i tyre me teknologjinë informative po bënë që shumë nxënës të kenë probleme në mësimnxënie.

Edhe Hatmane Demiri, drejtoreshë e shkollës “Ismail Qemali”, bëri apel që të rinjtë dhe të vegjlit të lexojnë sa më shumë.

“Ta vizitojmë sa më shumë bibliotekën; të lexojmë sa më shumë dhe t’i lëmë pak telefonat, sepse libri është më i mirë”, theksoi ajo.

Dita Botërore e Librit daton që nga 23 prilli i vitit 1995, me qëllim të kontribuimit në mbarë botën për të drejtat e autorit, duke inkurajuar të gjithë, e në veçanti të rinjtë, për të zbuluar kënaqësinë e leximit. /KosovaPress/