VV: Ata që thirren në Kushtetutë, e kanë shkelur vetë atë

Deputetë nga lëvizja Vetëvendosje sot në një konferencë për media në dhjetëvjetorin e Kushtetutës së Kosovës folën për siç thanë ata “shkeljet që ia kanë bërë Kushtetutës zyrtarët dhe institucionet më të larta të vetë shtetit të Kosovës”.

Anëtarja e Kryesisë dhe deputetja, Albulena Haxhiu tha se Kushtetuta nuk është akti më i lartë, sepse mbi të është pakoja e Ahtisaarit.

“Në dekadën e parë të Kushtetutës së Republikës së Kosovës nuk kemi se si mos t’i theksojmë pengesat e vazhdueshme të kësaj Kushtetute që ishte kompromis dhe jo shprehje e vullnetit publik e demokratik. Pra në draftimin e Kushtetutës, nuk u respektua parimi i kontraktualizmit, pra që Kushtetuta të ishte një kontratë e përbashkët, që do të shprehte vullnetin e përgjithshëm pra për shkrimin e saj do të duhej të pyetje secili! Sepse është akti më i lartë!Por në fakt në Kosovë, Kushtetuta nuk është akti më i lartë sepse mbi të e kemi pasur në vazhdimësi pakon e Ahtisaarit”, tha Haxhiu.

Ajo gjithashtu foli edhe për siç tha “pengesat, që një njërën anë dalin nga e drejta e vetos që shpesh duket si diktaturë e pakicës duke theksuar kështu se janë 10 vende të garantuara për përfaqësuesit serb të cilat pastaj pamundësojnë çfarëdo ndryshimi pozitiv, dhe në anën tjetër mungesa e të drejtës për referendum që mbyt demokracinë në vend”.

Anëtari i Kryesisë dhe deputeti, Sami Kurteshi foli për shkeljet që janë bërë Kushtetutës së Republikës së Kosovës nga vetë krerët e institucioneve që nga themelimi i saj.

Kurteshi foli gjithashtu edhe për shkeljet veç e veç që ka bërë Kuvendi, Presidenti, Qeveria, Kryeministri dhe vetë Gjykata Kushtetuese.

Ai gjithashtu përmendi marrëveshjet e dëmshme që sipas tij, cenojnë rëndë rendin kushtetues e sovranitetin e shtetit, përmes marrëveshjes së Zajednicës së komunave serbe dhe marrëveshjes së Demarkacionit me Malin e Zi.

“Dekada e dytë, duhet të jetë angazhim shoqëror për të pasur një Kushtetutë që do të jetë shprehje e vullnetit publik e demokratik. Një Kushtetutë që na kthen sovranitetin, integritetin, ushtrinë, demokracinë, barazinë e drejtësinë”, tha ai. /Telegrafi/