Rasti “Ryshfeti”, sot nuk do të publikohen video-inçizimet

Video-inçizimi i plotë në rastin “Ryshfeti” gjithsesi sot nuk do të shihet në seancë, me vendim të Gjykatës Penale të Shkupit. Gjykatësi Darko Todorovski tha se gjykata ka vendosur që inçizimet të prezantohet para opinionit, por në ndërkohë prokurori që kundërshtonte këtë, kërkoi që vendimi të dorëzohet edhe me shkrim që të mund të ketë ankesë në gjykatat më të larta.

Në seancën e sotme i pranishëm ishte edhe dëshmitari Ivan Nikollov Saçevaliev, biznesmeni nga Strumica, të cilit sipas aktit prokuror Zoran Zaev i ka kërkuar ryshfet, përcjell Telegrafi Maqedoni.

Zaev dhe avokatët e tij në seancën e kaluar kërkuan nga gjykata që opinioni të mos përjashtohet nga shikimi i video-inçizimeve, pasi sipas tyre, vetëm me prezantimin e videove të plota do të mund të kthehet nderi i humbur i kryeministrit.

Përndryshe, kryeministri Zoran Zaev është i akuzuar se gjatë kohës së kryesimit me Komunën e Strumicës nga biznesmeni Ivan Nikollov ka kërkuar ryshfet prej rreth 160 mijë euro për legalizimin e tokës ndërtimore./Telegrafi/