Piktura në krizë (Video)

Vlerësimi i artit luan rol shumë të rëndësishëm për kulturën e vendit, ngase tregon për kulturën që e posedon një vend. Kur ka pranim dhe vlerësim të mirëfilltë, anashkalohet edhe kriza në art.

Piktorja nga Mali i Zi, Zake Prelvukaj, thotë se arti jo vetëm në Kosovë po kudo është në krizë. Ajo ka një kërkesë: që institucionet të përqendrohen më tepër tek të rinjtë. Ndërsa, e pyetur se a vlerësohet arti në bazë të shitjes së pikturave, ajo tha se blerja e pikturave nga një koleksionues nga vendet e jashtme thotë se kjo është një arritje.

Edhe piktori Ali Alimusaj, i njohur për bagazhin e tij me mbi 30 mijë vepra arti, me 50 vite që merret me art, ka një preokupim për artin. Sipas tij, të bësh art në Kosovës është problem i madh, pasi pasohet nga vlerësimet subjektive, larg mendimit kritik e të saktë. Sipas tij, tregu në Kosovë paraqet një problem të madh për piktorin, ngase ndikon në përshtatjen e piktorëve të rinj, e jo në ruajtjen e veçorive të mirëfillta të artit që kultivojnë. /KP/