De Biasi tregon të vërtetën e shkarkimit nga Alavesi

Gianni De Biasi edhe zyrtarisht është shkarkuar nga skuadra spanjolle Deportivo Alaves.

Rezultatet e dobëta kanë bërë që krerët e klubit spanjoll të mos i besojnë më punën trajnerit italian.

Ish-trajneri i Kombëtares shqiptare, tregon për ‘Marca’ mënyrën se si u nda nga skuadra spanjolle e Alavesit vetëm katër ditë më parë.

Trajneri italian thotë se drejtuesit nuk i dhanë asnjë arsye pse e larguan, ndërsa shpjegon se ndeshja e fundit ishte e çuditshme, duke lënë të kuptohet se ka ndodhur diçka e rëndë.

“Në këtë botë nuk befasohem nga asgjë. Kur erdha këtu e dija që ishte një bast i madh për të gjithë. Ishte një bast për mua, por edhe për klubin. Për mënyrën se si e mora ekipin dhe për punën që po bëja gjatë kësaj kohe, sigurisht që mund të kisha më shumë besim nga drejtuesit”.

“Ma hoqën besimin dhe humbja e së shtunës ishte e çuditshme. Ekipi bëri një ndeshje të mirë, por thjesht kishim një moment të vështirë për të arritur rezultatet”.

“Nuk kisha asnjë motiv të qartë. Mendoj se ishte një vendim që mori klubi dhe duhet ta respektoj. Nuk është diçka që më pëlqen, por kështu ndodhi. Unë u motivova shumë, sepse skuadra nuk kishte asnjë pikë kur e mora dhe kishte shënuar vetëm një gol”.

“Mendoj se kur basti është kaq i madh, të gjithë kemi nevojë të qëndrojmë në të njëjtën anë dhe të besojmë tek ajo që po bëjmë. Në fund të fundit, kjo nuk i shërben asnjërit”, ka thënë De Biasi. /Telegrafi/