Qeveria kërkon falje, nuk ka pasur takim Trump-Zaev

Shërbimi për shtyp i qeverisë pranoi se nuk ka pasur takim tet-a-tet dhe bisedë ndërmjet kryeministrit maqedonas Zoran Zaev dhe presidentit amerikan Donald Trump. Në përgjigjen për Tv21, shprehen se bëhet fjalë për një takim joformal në korniza të Asamblesë së Përgjithshme të Kombeve të Bashkuara.

Për postimin në profilin e Facebook të Zaevit, i cili për një moment të shkurtër, atij i dha një peshë më të madhe, kërkojnë falje për këtë lëshim gjatë formulimit të fjalisë.

“Shërbimi për shtyp i qeverisë kërkon ndjesë për lëshimin eventual gjatë formulimit të strukturës semantike të fjalisë dhe nëse përdorimi i fjalëve “takim” dhe “ngjarje” ka bërë të ketë dallim gjatë interpretimit të informacionit”, thonë nga Shërbimi për shtyp i qeverisë.

Dje, kjo ngjarje ngriti shumë pluhur në opinionin vendas, ndërsa pati reagime nga disa qytetarë por edhe nga parti politike. Për lajmin se Zaev, Trumpit i ka shprehur mbështetje dhe i ka uruar fillim të suksesshëm të nismës për reforma në Kombet e Bashkuara, ai madje mori edhe përgëzime.

Dje kryeministri Zaev në fjalimin e tij në New York, në panelin ku u diskutua në temën “Kthimi i besimit ndaj Qeverisë”, mes tjerash dërgoi porosi se duhet që qeveritë t’u shërbejnë qytetarëve, gjë për të cilën, siç tha është zotuar kabineti i tij.