Reagon Zyra e Kryeministrit: Inventari dhe pajisjet e TI-së janë jashtë përdorimit, muaj dhe vite më parë

(E plotësuar) Zyra e Kryeministrit të Republikës së Kosovës përmes një reagimi ka thënë se lajmi për shitjen e inventarit të zyrës së kryeministrit nuk e pasqyron të vërtetën.

Sipas Zyrës së Kryeministrit, pajisjet dhe inventari që janë në shpallje publike, nuk i takojnë kabinetit të deritanishëm të ish-kryeministrit Isa Mustafa dhe nuk qëndron pohimi se do të blihen orendi të reja nga kryeministri Ramush Haradinaj.

“Zyra e Kryeministrit sqaron opinionin publik se shpallja publike për shitjen e inventarit të dalë jashtë përdorimit me numër reference SH01/2017, është proceduar ditë më parë nga ana e zyrës së prokurimit, duke respektuar çdo procedurë ligjore, dhe duke e publikuar në KRPP konform legjislacionit.
– Inventari dhe pajisjet e TI-së, janë jashtë përdorimit muaj dhe vite më parë, dhe janë të dëmtuara tërësisht.
– Inventari dhe pajisjet e TI-së, janë të dërguara në depon qendrore të Qeverisë në Graçanicë.
– Inventari dhe pajisjet e TI-së kanë vlerën në librat e zhvlerësimit të ZKM-së, të gjitha së bashku 48.30 euro”, thuhet në reagimin e Zyrës së Kryeministrit.

Gjithashtu thuhet se më qëllim që vlera e tyre të mos bjerë, apo që mos të dëmtohen akoma më shumë, menaxhmenti i ZKM-së kohë më parë ka vendosur t’i shes përmes ankandit publik me qëllim që të kemi transparencë dhe vlerë sa më të lartë të ofertave. /Telegrafi/

————————————————————————–

Dalin në shitje orenditë e zyrës së ish-kryeministrit Isa Mustafa (Dokument)

Isa Mustafa sot ia dorëzoi detyrën kryeministrit të sapoemëruar Ramush Haradinaj.

Megjithatë, me dorëzimin e postit, Mustafa duket se ka vendosur ta dorëzojë edhe inventarin e zyrës, shkruan GazetaFjala.

Këtë Zyra e kryeministrit do ta bëjë përmes ankandit publik.

Pjesë e ankandit sipas ofertës së Kryeministrisë, do të jenë të gjitha pajisjet, nga karriget, varëset e deri tek tavolina e punës, që ishin vendosur në kryeministri sipas shijes së Mustafës.

Këtë e konfirmon edhe Komisioni Rregullativ i Prokurimit Publik.

Ky institucion ka hapur ankandin “Inventarit zyrtar dhe pajisjeve të ndryshme të IT-së jashtë përdorimit” derisa autoritet kontraktues është Zyra e kryeministrit.

Ankandi do të vlejë deri me 15 shtator në ora 15:00.