Shumë informacione rreth helmimit në Shkup, nuk dihet cila është e vërteta

Mostrat e ushqimit të marrë nga shitorja “Sedmica” janë në rregull, por bakteria salmonela është detektuar tek 43 persona të hospitalizuar, njoftuan nga Agjencia për Ushqim dhe Veterinari (AUV). Për momentin akoma është e paqartë cila është prejardhja e bakteries.

Drejtoresha e Inspektoratit shëndetësor sanitar, Irena Buhova, tha se 43 personat janë helmuar nga salmonela dhe do të kërkohet përgjegjësi penale për këtë, përcjell Telegrafi Maqedoni.

Nga AUV edhe sot mbeten në qëndrimin se bakteret nuk janë arsye për helmimin në “Sedmica”. Sipas tyre, mostrat e marra nga dy lokalet në Karposh dhe Kisella Voda nuk kanë treguar prezencë të bakterieve.

Shitorja për ushqime të shpejta “Sedmica” pas katër ditë heshtje, mbrëmë përmes një kumtese njoftoi se gjithë ajo që ndodh është si pasojë e epidemisë së viruseve në stomak.

“Jemi sulmuar për helmim me ushqim dhe menjëherë mediat në një situatë të panjohur sulmuan punën tonë 30-vjeçare. Ju njoftojmë se pas hetimeve të bëra në mostra të ushqimit dhe hapësirën e punës, është vërtetuar se ushqimi përmbush të gjitha standardet e sigurisë mikrobiologjike”, njoftuan nga “Sedmica”./Telegrafi/