Deputeti i LDK-së e quan ‘blof i radhës’ tërheqjen e Kadri Veselit

Kadri Veseli dje është deklaruar se është i gatshëm ta lirojë vendin e tij prej kryeparlamentari me kusht që të votohet Qeverina në krye me Ramush Haradinajn.

Haxhi Avdyli, deputet i LDK-së, këtë lëvizje të Kadri Veselit e quan “blof të radhës” sepse, sipas tij, në momentin që tërhiqesh duhet të tërhiqesh burrërisht e jo të vësh kushte.

Ai mendon se brenda koalicionit PAN ka emra që ata do të mundë t’i votonin.

“Ne mendojmë se brenda PAN-it ka emra që mund të kryejnë me nder detyrën e kryeparlamentarit, por jo Kadri Veseli”, tha deputeti nga LDK-ja.

Ai bëri të qartë se LDK-ja është shumë e hapur ta zhbllokojë situatën, por jo me Kadri Veselin në krye të Parlamentit.

Në anën tjetër Artan Muhaxhiri, analist politik, thotë se për arsye që në seancën e parë u bë e qartë se PAN-i nuk i ka votat e ktheu situatën në një sferë tjetër, ku ka nevojë për kompromis.

Ai mendon që ky veprim i Veselit vjen si pasojë se në situata të tilla, kur vendi është para një bllokade politike, vlerësohet ai që bën kompromis.

“Veseli dëshiron të paraqitet si person i cili bën kompromise në sytë e popullit, por ky kompromis nuk është çfarë po kërkon lëvizja ‘Vetëvendosje’”, thotë Muhaxhiri.

Ai mendon se është pak e besueshme që “Vetëvendosja” dhe LAA-ja do të pranojnë këtë ofertë për vendosjen e Ramush Haradinajt në krye të Qeverisë.

Edhe analisti Imer Mushkolaj thotë se Kadri Veseli e di qartë se “Vetëvendosja” e LAA-ja nuk do ta votojnë Qeverinë e koalicionit PAN shkaku i PDK-së.

“Veseli po provon të shfaqet si njeri që ‘sakrifikon’ veten për të zgjidhur kriza, ndërkohë PDK-ja, partia e udhëhequr nga ai, në pamundësi për t’i siguruar numrat e nevojshëm për zgjedhjen e institucioneve po zvarrit procesin dhe po prodhon krizë”, tha ai. /Zeri/