Lajme Kosovë Siguri

Afera e korrupsionit në polici: Paratë fshiheshin në çorapë

Para 8 vitesh

Kamera të fshehta të vendosura në makinat e policisë kanë arritur të kapin dhjetëra veprime korruptive të policëve të rajonit të Mitrovicës të përfshirë marrjen e parave dhe detyrimin e shoferëve të kamionëve e makinave për të paguar mito.

Në njërin nga rastet më të mëdha të korrupsionit në Policinë e Kosovës Prokuroria e Mitrovicës pretendon se ka fakte për dhjetëra raste të mitëmarrjes të cilat dëshmohen nga materiale filmike të kapura nga kamerat e Inspektoriatit Policor.

Nga data 21 shtator deri 12 dhjetor 2016 IPK-ja fshehurazi kishte montuar kamera në makinat e policisë.

Materialet e filmuara shërbyen për t’i akuzuar 35 zyrtarë policorë apo pothuajse të gjithë njësinë e trafikut.

Në 31 faqe aktakuzë prokurorja Zejnie Kela përshkruan në detaje secilin veprim të policëve në aferën e korrupsionit.

Ngjarja e datës 23 shtator 2016 të përshkruhet në aktakuzë si moment kur policët Ahmet Hasani dhe Esat Haxhiu fituan bukur shumë para.

Dy policët janë filmuar tek ndalen në afërsi të Zhabarit për t’i numëruar paratë e marra mito. Filmimet e IPK-së tregojnë se policët ndanë në mes vete 7 bankënota 5 euroshe, 2 bankënota 10 euorshe e më vonë edhe 35 euro dhe 1000 dinarë.

Aktakuza përshkruan edhe veprimet e policit Esat Haxhiu. Ky polic është atraktiv pasi sipas aktakuzës bakënotën e marrë nga një qytetarë serb e kishte futur në çorapën e tij për ta fshehur aty nga çdo rastësi.

Akuza vazhdon duke përshkruar kontrollin e datës 24 shtator 2016. Atë ditë derisa dy zyrtarët policorë Ahmet Hasani dhe Sahit Hajdari po ndanin paratë e marra nga shoferët, kur vjen puna t’i ndajnë disa dinarë Hasani i thotë kolegut Hajdari se pse merrte para në këtë valutë.

“Mos i merr ato m… hiq”, shkruan në akuzën e policëve e cila vazhdon me sqarimin për dy zyrtarët policorë.

KALLXO.com kishte shkruar edhe më herët se policët e arrestuar paratë i merrnin edhe në dinarë.

Më tutje në aktakuzë tregohet se si policët e akuzuar për marrje ryshfeti udhëzonin të ndaluarit nga ta se ku t’ua lënë paratë.

“Pasi kanë ndaluar një kundërvajtës në komunikacion i cili kishte thyer rregullat e komunikacionit, kundërvajtësi afrohet para derës së automjetit të policisë dhe i pandehuri Sahit i bën me shenjë se ku ti hedhë paratë dhe i njëjti e hedh një bankënotë prej 5€ në pjesën e brendshme të derës së automjetit dhe nga aty i pandehuri Sahit i merr paratë dhe i fut në xhepin e tij”, shkruan në aktakuzë.

Aktakuza për të njëjtin zyrtar policor të akuzuar konstaton se edhe në raste tjera i ka marrë bankënotat nga makina dhe i ka futur në xhep.

Në raste interesante policët kishin tentuar t’i vidhnin edhe vetë kolegët, aktakuza përshkruan se si i akuzuari Sahit Hajdari i kishte marrë 20 euro mito të lëna në ulësen e prapme dhe të njëjtat i kishte zëvendësuar me 10 euro.

“Në orën 10:13 Sahiti merr nga ulësja një bankënotë në vlerë 20 € dhe e fut në kuletë, pastaj nxjerr nga kuleta dy kartëmonedha në vlerë nga 5 € dhe i len tek ulësja pastaj edhe ato i shtin në xhep dhe del nga automjeti”, sqaron aktakuza.

Në raste të tjera kuleta e policëve ishte bartur tek çorapet e policëve, ndërsa ndarja e parave kishte pasur probleme.

Siç përshkruhet në aktakuzë me datën 24 shtator 2016 i akuzuari Ahmet Hasani dhe Sahit Hajdari kishin një diskutim interesant pasi polici nuk po i gjente në çorapët e tij 10 eurot e marra paraprakisht.

“Po më vjen inati agj. Ahmeti ia kthen ‘Hajt se qasajde i gjon diku neper çorapë pi shtin o burrë, ça u bo, ça po i shtin atje”, thuhet në akuzën e prokurorisë.

Videot dhe audio-incizimet që u vendosën në veturat e policisë kanë kapur disa momente jo të mira të zyrtarëve policorë në pikën e kontrollit në fshatin Stanovc të Vushtrrisë në Magjistralen Prishtinë – Mitrovicë.