Thaçi diskuton sërish për Komisionin për të Vërtetën dhe Pajtimin, synon tejkalimin e urrejtjeve ndërmjet komuniteteve

Presidenti i vendit, Hashim Thaçi, nesër e ka thirrur edhe takimin e dytë konsultativ për Komisionin për të Vërtetën dhe Pajtimin.

Kjo iniciativë e ideuar prej tij, sipas Thaçit, është iniciativë e brendshme për t’i tejkaluar urrejtjet dhe armiqësitë e qytetarëve të të gjitha komuniteteve të shkaktuara nga lufta e fundit në Kosovë.

“Është Komision për të Vërtetën dhe Pajtimin e brendshëm në Kosovë, jo me Serbinë. Me Serbinë, Kosova është duke biseduar në Bruksel”, kishte sqaruar Thaçi, transmeton Telegrafi.

“Është shumë e dhimbshme të shohësh që sot, edhe gjeneratat që kanë lindur pas lufte, e shikojnë palën tjetër, i shikojnë moshatarët e komunitetit tjetër, si armiq dhe si rrezik”, kishte thënë ai.

Herën e kaluar, presidenti Thaçi kishte përmendur takimet me familjet e të pagjeturve, të të gjitha komuniteteve, duke theksuar se ata janë bërë bashkë në dhimbje dhe e kanë njohur njëri-tjetrin në dhimbjen e tyre, duke u familjarizuar me kauzën e tyre.

“Pajtimi i parë dhe më i shpejt shqiptaro-serb ka ndodhur mes familjareve të të pagjeturve. Duke e kuptuar vuajtjen e njëri-tjetrit janë bërë gati si një familje që punon për një qëllim të përbashkët, të mbyllin kapitullin e familjarëve të tyre të pagjetur. Ata janë shembulli më i mirë për të gjithë ne të tjerët sesi duhet të kthejmë sytë kah një e ardhme më e mirë, duke e mbyllur kapitullin e së kaluarës”, kishte thënë presidenti Thaçi.

Sipas tij, e vërteta pastron dhe çliron njerëzit, ndihmon, lehtëson dhe çon drejt pajtimit kombe e shtete.

“E vërteta shëron shoqëritë nga hakmarrja dhe urrejtja”, kishte thënë ai.

Qëllimi i kësaj iniciative, sipas presidentit Thaçi, është nisja e një jete të re dhe ndërtimi i një të ardhme më të mirë për të gjithë qytetarët, e cila assesi nuk do ta sakrifikonte drejtësinë, por do ta ndihmonte atë. /Telegrafi/