Qeveria e Kosovës nuk është në dijeni për ndërtimin e një objekti në veri për AKS-në

Ditë më parë ish-kryetari i Komisionit për Veriun në KK të Mitrovicës, Vesel Neziri, ka deklaruar se rreth 200 metra larg murit që është ngritur së fundi pranë urës së lumit Ibër në Mitrovicë, serbët kanë nisur ndërtimin e një objekti tjetër.

E që sipas tij ndërtimi i objektit po bëhet për Asociacionin e Komunave me shumicë Serbe.

Por, zyrtarët e Qeverisë së Kosovës nuk kanë njohuri për këtë ndërtesë, e cila tashmë ka filluar të ndërtohet dhe përgjegjësinë mbi këtë objekt po ia hedhin njëri-tjetrit.

Indeksonline ka kontaktuar me zyrën për media të Qeverisë së Kosovës, të cilët thanë se për këtë çështje duhet të bisedohet me Ministrinë e Drejtësisë ose Ministrinë e Mjedisit dhe Planifikimit Hapësinorë.

“Për diçka konkrete drejtojuni Ministrisë së Dialogut apo Ministrisë së Mjedisit dhe Planifikimit Hapësinorë të cilët kanë inspektuar punimet ditë më parë”, ka thënë për Indeksonline, zëdhënësi për media në Qeverinë e Kosovës, Faton Abdullahu.

Edhe ministrja e Dialogut thotë së ndërtimet e tilla janë kompetencë e MMPH-së. Ajo gjithashtu sqaron se në marrëveshjen e Brukselit për asociacionin nuk bënë pjesë çështja e ndërtesës.

“Drejtojuni Ministrisë së ambientit dhe planifikimit hapësinorë për ndërtim të tilla. Ne marrëveshjen e Brukselit për asociacionin nuk bënë pjesë çështja e ndërtesës”, ka qenë përgjigja e Tahirit për Indeksonline.

Por këtë e mohojnë në MMPH.

Atdhe Stefa nga Zyra për komunikim me publikun në këtë ministri, thotë se ata nuk janë në dijeni për këtë objekt dhe se kjo nuk është nën kompetencën e tyre.

“Ne lidhje me pyetjet e parashtruara ju njoftojmë se Inspektorati i MMPH-së nuk është ne dijeni rreth këtij objekti. Inspektorati i MMPH-së është përgjegjës për inspektim të objekteve që i takojnë kategorisë së tretë ndërsa objektet që i takojnë kategorisë së parë e të dytë janë në kompetencë të Komunave. Prandaj për një informatë të tillë ju rekomandojmë t’i drejtoheni Zyrës Administrative në Pjesën Veriore të Mitrovicës”, thuhet në përgjigjet e MMPH-së.

Ditë më parë shefja e Zyrës Administrative, Adriana Hoxhiq, ka thënë për Indeksonline se ky objekt ka filluar të ndërtohet pasi Bashkimi Evropian ka kryer të gjitha procedurat për tenderimin.

“Ne deri tani kemi paguar qira dhe pas decentralizimit Komuna e Mitrovicës është ndarë në dy administrata, në jug dhe veri. Me këtë decentralizim ndërtesa e komunës ka mbet në territorin e jugut kështu që veriu ishte në mungesë të një objekti. Për këtë arsye ka filluar ndërtimi për komunën veriore unë sa e di”, është shprehur ajo.

Më tej, Hoxhiq pati treguar se pas përfundimit të punimeve i gjithë stafi zyrtar në veri do të shpërngulet në objektin e ri./Indeksonline/