Sindikata e pavarur policore e pa kënaqur me Gjykatën Kushtetuese të Maqedonisë (Video)

Është i vonuar vendimi i Gjykatës Kushtetuese në lidhje me nismën që e dorëzuam dy herë. Kështu deklaroi kryetari i Sindikatës së Pavarur Policore Goce Dellçev Todev, pas vendimit të fundit të Gjykatës Kushtetuese për ta hedhur poshtë nismën për vlerësimin e kushtetutshmërisë për një pjesë të Marrëveshjes kolektive të nënshkruar vitin e kaluar ndërmjet sindikatës policore dhe Ministrisë së Punëve të Brendshme, përcjell Telegrafi Maqedoni.

Ai sqaron për TV21 se tani ka Marrëveshje të re kolektive dhe nenet e kontestuara në gjykatë, më nuk janë pjesë e rendit juridik.

“Puna e policëve që punojnë në objekte të ndara, i kthehet sistemit të rregullt. 176 orë pune gjatë një muaji. Kjo do të thotë se për një ditë pune, policët duhet të kenë 12 orë pushim efektiv, i cili do të vihet në pjesën e pushimit të paguar”, u shpreh Goce Dellçev, Sindikata e Pavarur Policore.

Gjykata Kushtetuese, vendosi ta hedhë poshtë nismën e Sindikatës së Pavarur Policore në seancën e mbajtur ditën e mërkurë më 7 dhjetor.

GRAFIKË:

“Parashtruesi i nismës nuk i ka cekur argumentet se për çfarë arsye konsideron se një pjesë e Marrëveshjes kolektive është në kundërshti me Kushtetutën. Në të janë shënuar vetëm problemet e brendshme me të cilat ballafaqohen në polici që më shumë kanë të bëjnë me zbatimin e kësaj marrëveshjeje.”

Dellçev Todev thotë se policët nuk heqin dorë as nga ideja për zhvendosjen e orarit të punës për një orë më herët. Në vend se në punë të fillojnë në orën 8:30, ata kërkojnë që të fillojnë në orën 7 e 30. Ai thotë se me këtë do të shmangej trafiku i rënduar që shkaktohet nga policët të cilët punojnë në objektet e ndara në të gjithë Maqedoninë./Telegrafi/