Tubim parazgjedhor i Lëvizjes Besa në Kërçovë

Në një komunikatë për Telegrafi Maqedoni, sonte Rilindja me BESË ka njoftuar pjesëmarrjen e saj në Kërçovë ku ka realizuar takime me banorët e kësaj zone, të cilët i kanë mirëpritur përfaqësuesit e Rilindjes me BESË.

Bartësi i listës zgjedhore në njësinë e pestë i Rilindjes me BESË, Arben Labënishti ka thënë:

“Premtimet e politikanëvë të korruptuar janë vetëm mashtrime për ta ruajtur (rimarrë) pushtetin, për interesat e tyre të ngushta, të cilat sjellin regres, përseritje të historisë së vjetër! Përkulja dhe bashkëjetesa me këta politikanë na le të shfrytezuar, të nëpërkembur, pa liri dhe dinjitet! Është koha që me votën tonë ta ndeshkojmë politikën e korruptuar dhe destruktive. Ejani së bashku më 11 dhjetor ta kurorëzojmë fitoren e “Rilindje me BESË”, duke rrethuar numrin 10-të! Kjo është e vetmja mundësi për ta ndeshkuar politikën klanoro-sunduese dhe për të sjell në drejtim një politikë të përgjegjëshme udhëheqëse, shërbyese të popullit! O sot, o kurrë!”

Lulzim Aliu nga Rilindje me BESË ka deklaruar se: “Po ashtu duhet të flasim edhe në emrin e të gjithë të burgosurve të pafajshëm që BDI-ja së bashku me pushtetin në të cilin është bashkëqeverisës i mbanë me pa të drejtë të mbyllur dhe nuk dëgjon zërin e tyre, zërin e pafajësisë, por është në anën e OBRM-së dhe gjyqeve të kurdisura. Të ngremë zërin ne për familjarët e Rastit të Sopotit, për familjarët e Rastit Monstra, për familjarët e Lagjes së Trimave. A e dini se përse BDI-ja nuk flet për këto dhe pengon tjerët që të flasin për këto? Sepse ajo është e kapur nga Magjar Telekomi; Sepse ajo dhe familja rreth saj janë të kapur nga subvencionet për bujqësi e blegtori; Sepse ajo dhe familja rreth saj janë të kapur nga tenderët për hidrocentralet apo për energji diellore. Andaj kërkoj nga Ju, që më 11 dhjetor të rrethoni numrin 10 dhe të vlerësoni me 10-she kandidatë më të mirë që ofron Koalicione “Rilindje me BESË”, ata që janë më të mirët, më të diturit, më të ndershmit, dhe më të moralshmit. Këtë vendim për Ju dhe të ardhmen e familjes Tuaj duhet ta merrni tani. O sot, o kurrë!”

Fadil Zendeli kryetari i RDK-së, në këtë tubim ka theksuar se ky koalicion do të dalë fitimtarë në zgjedhjet e 11 dhjetorit, pasi kemi platformën që ofron zgjidhje për të gjitha çështjet që kanë të bëjnë me shqiptarët në Maqedoni. /Telegrafi/