Ahmeti: BDI forcë që e mbron kauzën shqiptare në Maqedoni

Lideri i Bashkimit Demokratik për Integrim, Ali Ahmeti dje ka qëndruar në Dibër ku ka mbajtur takime dhe tubim qendrorë me qytetarë duke prezentuar platformën politike dhe kandidatët për deputetë, shkruan Telegrafi Maqedoni.

“Ajo që fitohet me gjak, vlera kurrë nuk i humb, asnjëherë. Ata që mendojnë për të shuajtur këtë lëvizje siç është BDI, i bëjnë pazaret pa ‘hanxhi’, pasi rrënjët tona janë në thellësi të tokës dhe pikërisht aty ruhet i freskët edhe gjaku i heronjve, prandaj le të kthehen mbrapsht, pasi BDI ka qenë dhe mbetet forca më përfaqësuese e që di të mbrojë kauzën shqiptare në këtë vend. BDI është forca që di të përballet edhe me ata të lyer me uthullë e vaj, prandaj duhet të luftojmë të gjithë bashkë, që të ftojmë të gjithë ata që për një moment hezitojnë, le t’i bashkëngjiten këtij misioni pasi i bëjnë mirë vetes, tërë proceseve të cilat nuk janë të lehta, më besoni si vëlla i juaji, unë nuk brengosem për një fitore të BDI-së, çështja shtrohet kush do të jetë puna jonë me 12 dhjetor. Para nesh ka një agjendë serioze që do vendime të mëdha”, deklaroi kryetari i BDI-së dhe bartësi i listës zgjedhore në njësinë zgjedhore numër 6, Ali Ahmeti.