Qenan Hasipi: Grusht shteti i dështuar nuk do të ketë ndikim në Maqedoni

Deputeti dhe kryetari i Partisë Demokratike të Turqve në Maqedoni (PDTM), Qenan Hasipi, në emisionin “10 Minuta” të TV21, ka thënë se është absurde të mendohet se kryetari i Turqisë, Rexhep Taip Erdogan, vetë e ka inskenuar grusht shtetin që të bëjë pastrime në sfera të ndryshme shoqërore, transmeton Telegrafi Maqedoni.

Ai ka dhënë vlerësimin se mbështetja e dhënë nga populli turk, Erdoganit, i cili më 15 korrik i bëri thirrje popullit për protestë masive kundër Armatës, është dëshmia më e mirë se kryetari turk nuk e ka inskenuar puçin dhe se e gjithë kjo është vetëm një teori konspirative.

Hasipi beson se situata në Turqi nuk do të ndikojë shumë në Maqedoni dhe se kriza e refugjatëve nuk varet nga kjo që po ndodh në Turqi.

„Gjithsesi, sipas mendimit tim, kjo mënyrë e zhvillimeve është zgjidhja më e mirë, jo vetëm për Maqedoninë, por për të gjithë rajonin. De-stabilizimi i Turqisë në një periudhë kur në Lindjen e Mesme ka luftë, me plotë kuptimin e fjalës është një element de-stabilizues i cili do të reflekton në rajon”, është shprehur Qenan Hasipi.

“Nuk pres ndonjë pasqyrim në Maqedoni të situatës në Turqi duke pas parasysh që vite më pas ne kemi pasur marrëdhënie të shkëlqyeshme me Republikën e Turqisë”, ka thënë ai.

Hasipi gjatë emisionit po ashtu ka informuar se jeta në Turqi ka filluar të normalizohet, dhe se të gjithë shtetasit turq me prejardhje nga Maqedonia janë mirë dhe vazhdojnë me obligimet e tyre të rregullta në kuadër të shoqërisë në Turqi./Telegrafi/