Të hyrat dhe shpenzimet shkojnë “fyt për fyt”

Pjesën më të madhe të shpenzimeve e përbëjnë Pagat dhe Mëditjet me pjesëmarrje prej 31 për qind; formimi i bruto kapitalit fiks, me pjesëmarrje prej 24 për qind; kontributet sociale dhe përfitimet, me pjesëmarrje prej 19 për qind.

Agjencia e Statistikave të Kosovës (ASK), ka publikuar të dhënat e fundit të llogarive qeveritare. Sipas ASK-së, llogaritë qeveritare paraqesin të ardhurat dhe shpenzimet e Qeverisë së Kosovës në bazë të mbledhjes së të dhënave administrative dhe llogaritjes që bënë ky institucioni i statistikave.

Sipas këtyre të dhënave, të hyrat u rritën mbi 26 për qind, ku pjesa më e madhe prej tatimeve në produkte. “Të hyrat e Qeverisë së Përgjithshme në vitin 2015 ishin 1,706.1 milionë euro, ku krahasuar me të hyrat e vitit të kaluar ka pasur një rritje prej 26.4 për qind të të hyrave. Pjesën më të madhe të të hyrave e përbëjnë tatimet në produkte, të cilat paraqesin 65 për qind të totalit të të hyrave, ndërsa pjesa e mbetur e të hyrave është shpërndarë në kategori të tjera të të hyrave”, thuhet në publikimin e ASK-së

Shpenzime e përgjithshme qeveritare shkojnë më shumë për paga dhe mëditje e më pas në kategoritë tjera. “Ndërkaq, totali i shpenzimeve të Qeverisë së Përgjithshme në vitin 2015 ishte 1,612.3 milionë euro. Pjesën më të madhe të shpenzimeve e përbëjnë Pagat dhe Mëditjet me pjesëmarrje prej 31 për qind; formimi i bruto kapitalit fiks, me pjesëmarrje prej 24 për qind; kontributet sociale dhe përfitimet, me pjesëmarrje prej 19 për qind; dhe konsumi i ndërmjetëm, me pjesëmarrje prej 14 për qind. Ndërsa, pjesa e mbetur e shpenzimeve është shpërndarë në struktura të tjera të shpenzimeve”, thekson publikimi.

Raporti thotë se Shpenzimet e Qeverisë së Përgjithshme, në vitin 2014 ishin më të ulëta se në vitin e kaluar (vitin 2015), sa ishin 1,512.1 milionë euro. /Kallxo.com/Telegrafi/