Të enjten zgjedhja e rektorit, tre kandidatë në garë

Marian Demaj, Nuredin Mestani dhe Jusuf Musliu janë kandidatët të cilët kanë aplikuar deri më tani për rektor të Universitetit të Prishtinës.

Një gjë të tillë e ka konfirmuar zyrtari i Komisionit Zgjedhor të UP-së, Safet Thaçi, i cili ka njoftuar se sot në ora 15:00 mbyllet konkursi, ndërsa pasnesër, më 31 mars pritet të mblidhet Këshilli Drejtues i UP-së për ta zgjedhur rektorin e ardhshëm.

Po ashtu, kryetari i Këshillit Drejtues, Ismet Salihu, ka thënë për KosovaPress se konkursi edhe këtë herë do të zhvillohet sikurse herën e parë, derisa ka shtuar se nëse edhe në këtë afat të zgjedhjes nuk arrin të emërohet askush në krye të UP-së, konkursi përsëritet prapë vetëm për rektor dhe jo për nivelet tjera të menaxhimit.

Ai, ka shtuar se dekanët, këshillat e fakulteteve apo studentët të cilët i kanë marrë mandatet vetëm sa e kanë filluar punën dhe asnjë nga këto nivele të menaxhimit nuk shkojnë në rizgjedhje por nëse rektori nuk arrin të zgjidhet edhe në këtë raund, rizgjedhjet shpallen vetëm për këtë pozitë.

Në raundin e parë ku kishin kandiduar pesë kandidatë për rektor të UP-së nuk kishte arritur asnjë nga ta t’i marrë shumicën e votave të KD-së, gjë që kishte bërë Këshillin Drejtues të rishpallë konkursin për herë të dytë.