“Anglia mund ta fitojë Evropianin”

Ish-trajneri i kombëtares së Anglisë, Sven-Goran Eriksson beson se Anglia mund ta fitojë Kampionatin Evropian në Francë, por ka theksuar se shpreson që mediat të mos bëjnë shumë presion në ekipin e Roy Hodgsonit.

Pritshmëritë kanë qenë gjithmonë të mëdha te kombëtarja e Anglisë, por që nga Evropiani i viti 1996, kur kishte arritur në gjysmëfinale, ajo nuk ka arritur të shkojë më lartë se çerekfinalja në një turne të madh, transmeton Koha.net.

“Presioni gjithmonë ka qenë i lartë te kombëtarja e Anglisë, në çdo turne të madh. Por, në këto dy vitet e fundit presioni mendoj se është zvogëluar mjaft shumë”.

“Ata kanë një ekip shumë të talentuar, shumë lojtarë të rinj. Shpresoj të mos kenë shumë presion, dhe mendoj se do ta kenë një shans. Kualifikimet ishin shumë të mira, pse jo edhe Evropiani të mos jetë i tillë”, ka thënë Eriksson për Omnisport.

Anglia është në Grupin B dhe do të përballet me Uellsin, Rusinë dhe Sllovakinë, kurse të martën luan miqësoren e radhës kundër Holandës. Mbrëmë Anglia mposhti kampionin e botës, Gjermaninë.