Kur “Rolling Stones” pushuan nga puna Donald Trumpin

Keith Richards, anëtar i grupit të rrokut në SHBA, “The Rolling Stones” ka kërcënuar Donald Trump-in me thikë në një koncert në vitin 1989.

Menaxheri i turneut të grupit “The Rolling Stones”, Michael Cohl tha se grupi nuk dëshironte që Trump të përfshihej në promovimin e grupit.

Grupi kishte nevojë për një promotor, i cili do të ishte i gatshëm të vinte në dispozicion miliona dollarë, por Stones nuk dëshironin të lidheshin me Trump.

Ata nënshkruan një marrëveshje me të, duke përcaktuar se ai nuk do të përfshihej në ndonjë cilësi promovuese jashtë Atlantic City dhe nuk do të lejohej në shfaqje.

Gjithçka nisi kur grupi do të jepte një intervistë në orën 6:40 të mbrëmjes në lajmet kombëtare, për të folur për dhe për të promovuar një metodë fitimi për ta, e njohur si pay-per-view, (paguaj që të shikosh).

Por Trump kishte përgatitur një konferencë për shtyp rreth një orë para se të kryhej intervista. Producenti Michael Cohl bëri disa përpjekje për të ndaluar Trump, por asgjë nuk funksionoi.

Ai tregon se punët shkuan deri aty sa, “Keith nxori thikën e tij mbi tavolinë dhe tha: Çfarë dreqin duhet të bëj, të shkoj vetë atje dhe ta pushoj nga puna? Njëri prej nesh duhet të lërë ndërtesën, ose ne ose ai”.

Producenti shkoi vetë të Trump dhe i shpjegoi situatën. Trump u zbut vetëm pasi në ndërtesë u shfaqën 40 roje të sigurisë të grupit. /Telegrafi/